Թբիլիսիի բնակելի շենքերից մեկում պայթյուն է տեղի ունեցել․ փլատակների տակ 7 մարդ կա, այդ թվում՝ երեխաներ
Քաղաքականություն
19.11.2026 | 15:38
Թբիլիսիի Քվեմո Փոնիճալա թաղամասի բնակելի շենքերից մեկում պայթյուն է տեղի ունեցել։ Նախնական տեղեկություններով՝ պատճառը կենցաղային գազի արտահոսքն է։ Sova News-ի հաղորդմամբ՝ շենքի փլատակների տակ մնում է 7 մարդ, այդ թվում՝ 3 երեխա։
Տեղում շարունակվում են փրկարարական աշխատանքները։ Վրաստանի ներքին գործերի նախարար Սուլխան Թամազաշվիլիի հայտարարությամբ՝ այս պահին փլատակներից դուրս է բերվել չորս մարդ, ևս յոթի գտնվելու վայրը պարզելու ուղղությամբ ակտիվ որոնողական աշխատանքներ են իրականացվում։
Չորս տուժածներն էլ հոսպիտալացվել են, նրանցից մեկի վիճակը գնահատվում է ծանր։ Տուժածների թվում կա նաև անչափահաս երեխա, որի մոտ ականջի վնասվածք է արձանագրվել, սակայն նա գիտակից վիճակում է։
Միևնույն ժամանակ, նախարարի խոսքով, շենքում պահպանվում է փլուզման իրական վտանգ, ինչի պատճառով փրկարարները ստիպված են եղել փոխել աշխատանքի մարտավարությունը։
«Մոտ կես ժամ առաջ հենասյունային պատը թեքվել է, ինչի հետևանքով շենքի ճակատային հատվածից փրկարարական աշխատանքները դադարեցվել են։ Փրկարարներն այժմ ակտիվորեն աշխատում են շենքի հակառակ կողմից։ Փլուզման վտանգն իսկապես մեծ է»,- նշել է ՆԳ նախարարը։
Անդրադառնալով պայթյունի պատճառներին՝ Սուլխան Թամազաշվիլին հայտնել է, որ արդեն պարզվել են պայթյունի օջախը և նախնական պատճառը։ Ըստ նրա՝ միջադեպը կապված է բնակելի շենքի հինգերորդ հարկի բնակարաններից մեկում տեղադրված գազի ջեռուցիչի անսարքության հետ։
Թարգմանությունը՝ Էմմա Չոբանյանի

