Քաղաքականություն
01.08.2022 | 16:55
Թուրքիայի նախագահի մամուլի խոսնակ, գլխավոր խորհրդական Իբրահիմ Քալընը Kanal7-ի հետ հարցազրույցում անդրադարձել է Թուրքիայի՝ ՌԴ-ի հետ համատեղ անօդաչու թռչող սարքերի արտադրության ոլորտում հնարավոր համագործակցության հարցին։ Մասնավորապես, նա հաստատել է ավելի վաղ ԶԼՄ-ներում տարածված լուրերը, թե ՌԴ նախագահ Վլադիմիր Պուտինը Թեհրանում կայացած հանդիպմանը Թուրքիայի նախագահ Ռեջեփ Թայիփ Էրդողանին առաջարկել է Ռուսաստանում «Բայրաքթար» անօդաչուների արտադրություն հիմնել։
Քալընը նշել է, որ Պուտինի կեսկատակ նման առաջարկ է արել։
«Կեսկատակ-կեսլուրջ պարոն Պուտինն ասել է՝ Ուկրաինային անօդաչու թռչող սարքեր եք տալիս, եթե մեզ էլ մատակարարեք, մենք էլ կուզենայինք գնել։ Ի պատասխան՝ մեր նախագահը ժպտացել է»,- ասել է Քալընը։
Նա հավելել է, որ Թուրքիան անօդաչուներ վաճառելու պարտավորություն չունի։
«Պարոն Պուտինը նույնպես տեղյակ է մեր դիրքորոշմանը։ Մենք ճանաչում ենք Ուկրաինայի ինքնապաշտպանության իրավունքը։ Բայց մենք դա անում ենք ոչ թե պատերազմ հրահրելու, այլ այն հնարավորինս շուտ դադարեցնելու համար»,- ասել է Էրդողանի խոսնակը։
Հիշեցնենք՝ թուրքական լրատվամիջոցները տեղեկություններ էին տարածել, որ Էրդողանը կուսակցական ղեկավարության հետ հանդիպման ժամանակ գործընկերներին ասել է, թե Թեհրանում վերջերս կայացած հանդիպման ժամանակ Պուտինը դիմել է իրեն՝ առաջարկելով գործարք կնքել ՌԴ-ում թուրքական «Բայքար» ընկերության հետ՝ հարվածային անօդաչու թռչող սարքեր արտադրելու համար։
Անդրադառնալով այս թեմային՝ ՌԴ նախագահի մամուլի խոսնակ Դմիտրի Պեսկովը չէր հերքել Պուտինի առաջարկի մասին լուրը՝ նշելով, որ երկու երկրների միջև ռազմատեխնիկական համագործակցությունը մշտապես օրակարգում է։ Նա հաստատել էր, որ երկու երկրների նախագահների վերջին շփումների ընթացքում շոշափվել է ռազմատեխնիկական համագործակցության թեման, և հարցը, հավանաբար, քննարկվելու է նաև Թուրքիայի նախագահ Ռեջեփ Թայիփ Էրդողանի՝ օգոստոսի 5-ին Սոչի կատարելիք այցի ընթացքում։
Էմմա Չոբանյան
