Եղիշե Կիրակոսյանը՝ գերիների վերադարձի գործընթացի մասին․ ՏԵՍԱՆՅՈՒԹ

«Իրավական գործընթացներով ինչ հնարավոր է անել գերիների վերադարձն ապահովելու համար, արվել է առավելագույնը»- լրագրողների հետ զրույցում այս մասին նշեց ՄԻԵԴ-ում Հայաստանի ներկայացուցիչ Եղիշե Կիրակոսյանը:

Նրա հավաստմամբ՝ թե՛ ՄԻԵԴ-ում, թե՛ Արդարադատության միջազգային դատարանում բազմիցս բարձրայնվել է հայ գերիների վերադարձն ապահովելու հարցը: «Ցավոք, դատարանները որոշել են, այսպես ասած, դուրս չգալ իրենց շրջանակներից. այդ դատարաններն ունեն որոշակի սահմանափակվածություն և պահպանողականություն»:

«ՄԻԵԴ-ի միջանկյալ և ժամանակավոր միջոցները կիրառվում են հստակ շրջանակներում, հիմնականում 2-րդ, 3-րդ հոդվածների խախտման ռիսկերի չեզոքացման տրամաբանության մեջ, բացառիկ դեպքերում կարող են կիրառվել 8-րդ հոդվածի՝ անձնական կյանքի, անձեռնմխելիության իրավունքի ապահովագրման տրամաբանության մեջ: Մենք այս ամեն ինչը գիտակցելով՝ այդ փորձն արել ենք: ՄԻԵԴ-ի որոշումները լինում են շատ հակիրճ. այս պահին ունենք միայն 2-րդ և 3-րդ հոդվածների վեաբերյալ միջանկյալ միջոցներ, որոնք վերաբերում են ռազմագերիներին, նրանց կյանքի, առողջության և ֆիզիկական անձեռնմխելիության ապահովմանը»,- նշեց Կիրակոսյանը՝ հավելելով, որ նույն միջոցը կիրառվել է նաև Արդարադատության միջազգային դաարանի կողմից, որի բովանդակությունը հատուկ ուղղված է էթնիկ հայերի իրավունքների և անվտանգության պաշտպանությանը՝ ադրբեջանական վերահսկողության ներքո:

Կիրակոսյանի խոսքով՝ Ադրբեջանի կողմից հաստատվել է, որ հայ գերիների թիվը հասնում է 38-ի, բայց կա նաև անձանց թվաքանակ, որոնց մասին կան տեսանյութեր կամ այլ ապացույցներ, որոնք թույլ են տալիս ենթադրել, որ նրանք առնվազն ինչ-որ ժամանակ եղել են ադրբեջանական վերահսկողության ներքո. «Այդ մարդկանց ուղղությամբ ևս աշխատանքներ տարվում են»:

Մանրամասները՝ տեսանյութում: