30.10.2026 | 17:34
«Ապրելու երկիրը» կմասնակցի Կապանի ՏԻՄ ընտրություններին․ ցուցակը կգլխավորի Տիգրան Աղասյանը
Քաջարանի համայնքապետը կշարունակի մնալ կալանքի տակ
Հասարակություն
27.07.2021 | 13:49
Վերաքննիչ քրեական դատարանը՝ դատավոր Արմեն Դանիելյանի նախագահությամբ, քիչ առաջ որոշում կայացրեց մերժել Քաջարանի համայնքապետ Մանվել Փարամազյանի կալանավորման դեմ պաշտպանների ներկայացրած բողոքը: Այս մասին Factor.am-ի հետ զրույցում հայտնեց համայնքապետի պաշտպան Երվանդ Վարոսյանը:
«Պարոն Փարամազյանը շատ լավ հասկանում է, թե ինչ է կատարվում, անակնկալ որևէ բան չկար իր համար։ Բնականաբար, սպասելի էր դատավոր Արմեն Դանիելյանի պարագայում, եթե սպասելի չլիներ, երեկ դատական նիստերի դահլիճից դուրս չէինք գա։ Մենք միանշանակ դիմելու ենք Վճռաբեկ դատարան, շարունակությունը կերևա՝ ըստ դատարանի արդյունքի»,- ասաց փաստաբանը:
Հիշեցնենք՝ Մանվել Փարամազյանին մեղադրանք է առաջադրվել ՀՀ քրեական օրենսգրքի 38-178-րդ հոդվածի (խարդախություն կազմակերպել) 3-րդ մասով, 311-րդ հոդվածի (Կաշառք ստանալը) 4-րդ մասով և 154.2-րդ հոդվածի (Ընտրողի կամքի ազատ իրականացմանը խոչընդոտելը) 2-րդ մասով: Համայնքապետը երկու ամսով կալանավորվեց հուլիսի 10-ին՝ Երևան քաղաքի ընդհանուր իրավասության դատարանի դատավոր Գագիկ Պողոսյանի որոշմամբ։
Առաջադրված մեղադրանքները Մանվել Փարամազյանը չի ընդունում․ ըստ նրա՝ այս ամենն «իր նկատմամբ սանձազերծված քաղաքական հետապնդման շղթայի մի մասն է»: Փարամազյանը Սյունիքի նախկին մարզպետ Վահե Հակոբյանի հիմնադրած «Վերածնվող Հայաստան» կուսակցության անդամ է։
Ռոզա Վարդանյան
