09.09.2026 | 23:17
Ինչ են քննարկել Փաշինյանը և Մակրոնը. Կառավարությունը մանրամասներ է ներկայացրել
ԱԺ-ում ընտրում են Բարձրագույն դատական խորհրդի անդամներին
28.02.2018 | 10:49
Ազգային ժողովում մեկնարկեց Բարձրագույն դատական խորհրդի 5 անդամի ընտրությունը: Բարձրագույն դատական խորհրդի տասը անդամներից հինգին ընտրելու է Ազգային ժողովը` փակ քվեարկությամբ, մյուս հինգին՝ դատավորների ընդհանուր ժողովը՝ բոլոր ատյանների դատարաններից:
ԱԺ ՀՀԿ խմբակցությունը կոալիցիոն գործընկերոջ՝ ՀՅԴ-ի հետ Բարձրագույն դատական խորհրդի անդամի պաշտոնում առաջադրել է Գագիկ Հարությունյանի, Գևորգ Դանիելյանի, Լիպարիտ Մելիքջանյանի, Հայկ Հովհաննիսյանի և Սերգեյ Մեղրյանի թեկնածությունները:
Թեկնածուները երեկ հանդես եկան ելույթներով, պատասխանեցին պատգամավորների հարցերին: Նկատենք, որ հիմնականում հարցեր էին հնչեցնում ընդդիմադիր «Ելք» խմբակցության պատգամավորները: Նրանց հետաքրքրող հիմնական հարցը Հայաստանում քաղբանտարկյալների լինել-չլինելու հարցն էր: Խմբակցության ղեկավար Նիկոլ Փաշինյանը նաև հարցեր էր հնչեցնում նախագահ Սերժ Սարգսյանի՝ 2014 թվականի ապրիլի 10-ին արած հայտարարության վերաբերյալ, ըստ որի՝ Սարգսյանը վարչապետի պաշտոնը ստանձնելու ցանկություն չունի:
Բարձրագույն դատական խորհրդի անդամները, սակայն, խուսափեցին պատասխանել այդ հարցերին՝ պատճառաբանելով, որ իրենք հնչած հարցերին անդրադառնալու լիազորություն չունեն: ՀՀԿ-ի և ՀՅԴ-ի թեկնածուներին դեմ քվեարկելու մասին երեկ հայտարարեց «Ելք» խմբակցության ղեկավար Նիկոլ Փաշինյանը: «Ծառուկյան» խմբակցությունում, ինչպես նշեց խմբակցության պատգամավոր Գևորգ Պետրոսյանը, առաջադրված հինգ թեկնածուների հանդեպ դրական են տրամադրված, ուստի կողմ են քվեարկելու:
