12.11.2026 | 13:06
Հոգեկան առողջության խնդիրներ ունեցող անձանց մասով խարան կա ձևավորված․ Առողջապահության փոխնախարար․ ՏԵՍԱՆՅՈՒԹ
TRIPP-ի զարգացման ընկերության համար հատուկ իրավական կարգավորումներ կսահմանվեն․ ԱԺ-ն առաջին ընթերցմամբ ընդունեց փաթեթը
Քաղաքականություն
12.11.2026 | 12:58
Ազգային ժողովն այսօր արտահերթ նիստում առաջին ընթերցմամբ ընդունեց «Բաժնետիրական ընկերությունների մասին» օրենքում լրացումներ կատարելու և կից օրենքների նախագծերի փաթեթը։
Հիմնական զեկուցող, արդարադատության նախարարի տեղակալ Տիգրան Դադունցը նշեց, որ արտահերթ նիստ հրավիրելու անհրաժեշտությունը պայմանավորված է նրանով, որ 2026 թվականի հոկտեմբերի 26-ին խորհրդարանն ընդունել է TRIPP-ի վերաբերյալ ռազմավարական համագործակցության մասին շրջանակային համաձայնագիրը վավերացնելու մասին օրենքը։ Դրանով պայմանավորված՝ մեկնարկելու են TRIPP զարգացման ընկերության հիմնադրման աշխատանքները։
«Այս փոփոխություններն իրավական առումով կապահովեն գործընթացի իրականացումը, կազմակերպության հիմնումը սահուն և կարճ ժամկետներում, ինչը թույլ կտա առաջ մղել TRIPP-ի ծրագիրը»,- ասաց Դադունցը:
Նախարարի տեղակալի խոսքով՝ ներկայացված օրենսդրական փաթեթով առաջարկվում է ՀՀ իրավական համակարգում ներդնել նոր ինստիտուտ, որը հնարավորություն կտա միջազգային պայմանագրերի հիման վրա ստեղծվող ընկերությունների համար սահմանել հատուկ իրավական կարգավորումներ։
«ՀՀ-ն ընդլայնում է միջազգային տնտեսական համագործակցությունը, որի շրջանակում իրականացվելու են ենթակառուցվածքային, տրանսպորտային, տարանցիկ, էներգետիկ և ներդրումային կարևոր ծրագրեր։ Դրանց իրականացման համար կարող են ստեղծվել առանձին ընկերություններ, այդ թվում՝ ՀՀ-ի և օտարերկրյա գործընկերների մասնակցությամբ։ Նման ընկերությունների կառավարման մոդելը ձևավորվում է նաև միջազգային բանակցությունների ընթացքում ձեռք բերված պայմանավորվածությունների հիման վրա»,- ասաց նա:
Նախագծով սահմանվում է, որ հատուկ կարգավորումները կարող են կիրառվել միայն այն դեպքում, երբ ընկերությունը ստեղծվում է ՀՀ-ի վավերացրած միջազգային պայմանագրի հիման վրա և դրա իրագործման նպատակով, ինչպես նաև եթե ՀՀ-ն այդ ընկերությունում ունի առնվազն 25 տոկոս մասնակցություն։
«Առաջին պայմանը մեխանիզմի առանցքային երաշխիքներից է, քանի որ ապահովում է միայն ԱԺ-ի կողմից վավերացրած միջազգային պայմանագրի առկայության դեպքում այս կարգավորումների կիրառումը, իսկ երկրորդ երաշխիքը նախագծով նախատեսված հարցերի հստակ ցանկն է, որոնց դեպքում թույլատրվում է օրենքից տարբերվող առանձնահատկությունների նախատեսում»,– ասաց նա։
Նախարարի տեղակալը պարզաբանեց, որ 25 տոկոսի շեմն ընտրվել է՝ հաշվի առնելով «Բաժնետիրական ընկերությունների մասին» օրենքի պահանջը, ըստ որի՝ կարևորագույն որոշումների ընդունման համար անհրաժեշտ է բաժնետերերի ձայների երեք քառորդը։ Հետևաբար, 25 տոկոս և ավելի մասնակցությունը պետությանը հնարավորություն է տալիս ազդեցություն ունենալ ընկերության կառավարման մարմիններում։ Նախատեսվում է նաև, որ պետության մասնակցությունը 25 տոկոսից նվազելու դեպքում հատուկ ռեժիմն այլևս չի գործի։
Քվեարկության արդյունքներով նախագիծն ընդունվեց առաջին ընթերցմամբ։ Կողմ քվեարկեց 64 պատգամավոր, դեմ և ձեռնպահ ձայներ չկային։ Առաջարկներ ներկայացնելու համար սահմանվեց երեք ժամ։
Նախագծի երկրորդ ընթերցմամբ քննարկումն առաջարկվում է կազմակերպել առաջին ընթերցմամբ ընդունվելուց հետո՝ 24 ժամվա ընթացքում։ «Ուժեղ Հայաստան» և «Հայաստան» խմբակցությունները չէին մասնակցում նիստին:
Արփի Հակոբյան
