Չնայած ՊՆ-ն ու վարչապետի խոսնակը հերքում են, որ ադրբեջանցիները ներխուժել են Սոթքի հանքի տարածք, քիչ առաջ Factor.am-ին հաջողվեց կապ հաստատել հանքի աշխատակցիներից մեկի` ինժեներ Հարություն Հարությունյանի հետ։
Նա նշեց, որ հարցերի պատասխանել չի ցանկանում, միայն ասաց․ «Էդ ձեր պաշտոնականները սուտ են խոսում, մենակ դա կարամ ասեմ»։
Հանքի տնօրենի հեռախոսահամարը նախ զբաղված էր, հետո՝ դարձավ անհասանելի։
Հավելենք, որ Գեղարքունիքի մարզպետ Գնել Սանոսյանն էլ պնդում է, թե խնդիրը դարպասի տեղադրման վայրի հետ է կապված:
«Դա հիմա եռակողմ քննարկման փուլում է, իսկ ինչ վերաբերում է հանքի բուն տարածք նրանց մուտքին, դա իրականությանը չի համապատասխանում»,- հավաստիացրեց նա։
Մանրամասները՝ տեսանյութում։
Ի դեպ, միջադեպի մասին գրառում է կատարել նաև Մայր Աթոռ Սբ Էջմիածնի քրիստոնեական դաստիարակության կենտրոնի տնօրեն Զաքարիա Ծայրագույն վարդապետ Բաղումյանը:
«Քիչ առաջ կապվեցի այս պահին ազերիների հետ վիճաբանող Սոթքի հանքի աշխատակիցներից մեկի տղայի հետ: Մերոնք 9-10 հոգի են, իսկ ազերիները` մի քանի տասնյակ: Ըստ վկայության` սահմանը գծել են և մի քիչ էլ անցել մեր պետական սահմանը: Թուրքերը հրաժարվում են խոսել մեզ հետ, թե բա մենակ ռուսների հետ կխոսենք»,- գրել է նա:
Լիլիթ Շաբոյան
