17.10.2026 | 19:25
Հռոմի պապ Լևոն XIV-ը լքել է հիվանդանոցը՝ թոքի ուռուցքի հեռացման վիրահատությունից հետո
ԵՐԵՎԱՆԻ ԺԱՄԱՆԱԿՈՎ. Առանց մարտի 1-ի արյան չէր լինի թավշյա ձգտումը. Արմեն Մարտիրոսյան. ՏԵՍԱՆՅՈՒԹ
Քաղաքականություն
29.02.2020 | 20:00
«Առանց մարտի 1-ի արյան չէր լինի թավշյա ձգտումը, առանց այդ արյան չէր լինի թավշյա հեղափոխության զգուշությունը: Ընդ որում, այդ զգուշությունը միայն հեղափոխության լիդերների կողմից չէր ցուցաբերվում, այլև՝ ամեն քաղաքացու: Մարտի 1-ի ամենակարևոր դասն էր՝ ոչ թե գլուխը կախ գործ անել, այլ անընդհատ պայքարել»,- Factor TV-ի «Երևանի ժամանակով» զրուցաշարի շրջանակում նման տեսակետ է հայտնում «Անտարես» հրատարակչության տնօրեն Արմեն Մարտիրոսյանը:
Անդրադառնալով Հայաստանի ներքաղաքական կյանքին՝ մեր զրուցակիցը նշեց, որ այսօր մենք չունենք ընդդիմություն. «Ներկայիս «ընդդիմության» կողմից տեսնո՞ւմ եք որևէ քայլ, որը չի արվում հանուն նեղ կուսակցական շահի: Այդ ուժերն անընդհատ պատրաստ են փոփոխվել: Այնքան արագ են փոփոխվում, մանևրում, որ լեզուս չի պտտվում այդ ուժերին ընդդիմություն կոչեմ»:
Հրատարակչության տնօրենը համոզմունք հայտնեց, որ Հայաստանում համատարած գիրք չեն կարդում, պաշտոնյաները՝ նույնպես. «Եթե 2018-ի աշնանը հայտնի մարդկանց էինք հրավիրել՝ որպես գրքի խորհրդատուներ և եռօրյա միջոցառման ժամանակ մեզ այցելել էր 20-30 պատգամավոր, ապա 2019-ի միջոցառմանն այցելել էր միայն մեկը: Գուցե պատգամավորները շատ զբաղված են…»:
Պարոն Մարտիրոսյանը կարծում է, որ Նիկոլ Փաշինյանն, օրինակ, գրքի տոնին իր ակտիվությամբ կարող է նպաստել գրքի հանդեպ հետաքրքրության ձևավորմանը. «Դա և՛ վարչապետի, և՛ նախագահի ու նախարարների գործն է»: Նորանկախ Հայաստանում երկրի ղեկավարներից ամենաընթերցասերը, ըստ Արմեն Մարտիրոսյանի, Լևոն Տեր-Պետրոսյանից հետո հենց Նիկոլ Փաշինյանն է. «Ինձ թվում է՝ Քոչարյանը հայերեն գիրք չի կարդացել, Սերժ Սարգսյանը տեղեկացված էր, քանի որ շրջապատված էր ընթերցող մարդկանցով, իսկ Փաշինյանի շրջապատն այդ առումով նրա ֆոնին ստվերվում է»:
Աննա Բաբաջանյան
