Առաջարկվում է ազգային հավաքականի թիմում խաղալու հիմքով բանակից ազատել մի ֆուտբոլիստի, որը հավաքականի կազմում չկա և չի եղել

Կառավարությունում ԿԳՄՍՆ-ի կողմից շրջանառվում է որոշման նախագիծ, որով նախատեսվում է պարտադիր զինվորական ծառայությունից ազատել ֆուտբոլիստ Էդուարդ Թաթոյանին, որը Հայաստանի ազգային հավաքականի անդամ չէ: Սակայն, շրջանառվող նախագծում որպես հիմնավորում նշված է հավաքականի անդամ լինելը:

«Նախագծի ընդունումը պայմանավորված է այն հանգամանքով, որ Էդուարդ Նասիբի Թաթոյանին ՀՀ Կառավարության 2019 թվականի հունվարի 31-ի № 47-Ա որոշմամբ տարկետում է տրվել մինչև 2019 թվականի ձմեռային զորակոչը։ Քանի որ Էդուարդ Նասիբի Թաթոյանի 26 տարին լրացել է 2019 թվականին օգոստոսի 9-ին, հնարավոր չէ նրան շարքային կազմի պարտադիր զինվորական ծառայության զորակոչից տարկետում տալ։ Հետևաբար անհրաժեշտություն է առաջացել նրան ազատել շարքային կազմի պարտադիր զինվորական ծառայությունից։ Էդուարդ Նասիբի Թաթոյանը հանդես է գալիս ֆուտբոլի Հայաստանի Հանրապետության ազգային հավաքական թիմում, աչքի է ընկնում արդյունավետ խաղով, և կարևորվում է նրա մասնակցությունը Եվրոպայի առաջնությանն ու ընտրական խաղերին»,- ասված է նախագծում։

Էդուարդ Թաթոյանը ռուսաստանաբնակ հայ է, ժամանակին խաղացել է Մոսկվայի «Լոկոմոտիվի» ակադեմիայում, ունեցել է ՌԴ քաղաքացիություն։ Հայաստանի ազգային հավաքականի կողմից հրավիրվել է Հայաստան, ստացել է ՀՀ քաղաքացիություն, սակայն երբեք ազգային հավաքականում չի խաղացել, եղել է Մ19 տարեկանների հավաքականում։ Ֆուտբոլիստն այժմ խոշոր գործարար Սամվել Կարապետյանին պատկանող Մոսկվայի «Արարատ» ակումբի անդամ է:

Factor.am-ը ՀՀՖ մամուլի խոսնակ Հայկ Կարապետյանին խնդրեց մեկնաբանել, թե ինչպե՞ս է ստացվում, որ Էդուարդ Թաթոյանը, որը, ի դեպ, ազգանունը փոխել է Ստուրկիի, ազատվելու է պարտադիր ծառայությունից՝ ազգային հավաքականի անդամ լինելու հիմնավորմամբ:

«Էդուարդ Թաթոյանը տարբեր տարիներին եղել է մինչև 21 տարեկանների թեկնածու: Քանի որ նա եղել է ՌԴ քաղաքացի, ՀՖՖ-ն, եթե չեմ սխալվում, 2011 թվականին միջնորդել է, որ ՀՀ քաղաքացիություն ստանա: Արդյունքում դարձել է ենթակա զինվորական ծառայության, քանի որ օգնել է հավաքականին, եղել է թեկնածու, գնացել է այդ քայլին, որ ստանա ՀՀ քաղաքացիություն։ Երբ տարկետումը լրանում է, ՀՖՖ-ն իր միջնորդությունը հետ չի կանչում, որովհետև բնակվելով ուրիշ երկրում, իսկ ինքը հիմա բնակվում է ՌԴ-ում, արդար չի լինի, որ գա և ծառայի ՀՀ-ում: Իսկ Կառավարության բնորոշումը, որ հավաքականի ֆուտբոլիստ է, պարզաբանումը ստացեք Կառավարությունից»,- ասաց ՀՖՖ խոսնակը:

Նախագիծը հեղինակած ԿԳՄՍ նախարարությունից Factor.am-ին փոխանցեցին, որ նախագծում կան թերություններ, և առաջիկայում պարզ կլինի, թե որ օղակն է թերացել:

Նարեկ Կիրակոսյան