Միջազգային սկանդալի առջև ենք կանգնելու. Գևորգ Գորգիսյանը՝ Ամուլսարը շահագործելու Կառավարության որոշման մասին․ ՏԵՍԱՆՅՈՒԹ

Factor.am–ի հարցազրույցը ԱԺ «Լուսավոր Հայաստան» խմբակցության քարտուղար Գևորգ Գորգիսյանի հետ

– Պարո՛ն Գորգիսյան, Ամուլսարը շահագործելու՝ Կառավարության դիրքորոշմանն ի՞նչ գնահատական կտաք, և Դուք ինչո՞ւ եք դեմ հանքի շահագործմանը:

– Նախ՝ անդրադառնանք վարչապետի նախկին հայտարարություններին: Ինքը պնդում էր, որ որևէ որոշում չի կայացվի, քանի դեռ չկա արժանահավատ տեղեկություն, որ հանքի շահագործումը շրջակա միջավայրին վնաս չի հասցնելու, բայց այդպիսի հետազոտություն չի արվել:

– Իսկ «Էլարդ» ընկերության եզրակացությո՞ւնը:

– «Էլարդը» միջազգային հեղինակություն չունի, հայտնի է միայն Լիբանանում, փորձ ունի նավթի և գազի հանքերի հետազոտությունների հետ կապված: Տարօրինակ հանգամանքներում է ընտրվել այդ ընկերությունը, և որևէ հավատ իր արած ուսումնասիրությունը չի ներշնչում: Տպավորություն է, որ մինչ այս հետազոտությունն էլ որոշումը կայացվել էր: Վարչապետի ելույթն էլ ավելի շատ հարցեր առաջացրեց, քան տվեց պատասխաններ: Իսկ եթե նայենք թեկուզ ֆեյսբուքյան տրամադրությունները, ապա բոլորը դժգոհ են վարչապետի ելույթից: Հանքերում աշխատող բոլոր քաղաքացիներն ունեն առողջական խնդիրներ: Մենք այս ամենի հետևանքով միջազգային սկանդալների առաջ ենք կանգնելու, նույն Թեղուտի արտանետումները լցվում են Դեբետ գետը, դա մեծ վտանգներ է առաջացնելու, եթե մեր հարևանները սկսեն բողոքել:

– Ըստ Ձեզ՝ Կառավարությունն ինչո՞ւ է գնում հանքը շահագործելու քայլին:

– Կարծում եմ՝ մի քիչ վախեցած են միջազգային դոնորներից, մի քիչ վախեցած են արբիտրաժային դատարանի սպասվելիք ընթացակարգերից, որոնք, որոշ իրավաբանների պնդմամբ, հիմնավոր էլ չեն, և եթե Կառավարությունը լավ պատրաստված լիներ, չէին մտահոգվի: Բացի այդ՝ ձախողել են տնտեսական հեղափոխությունը և հանքի շահագործմամբ փորձելու են մինչև տարեվերջ ցույց տալ, որ ներդրումներ կան:

Հարցազրույցն ամբողջությամբ՝ տեսանյութում:

Շողիկ Գալստյան