Ֆրանսիայում բողոքի ցույցեր են․ կես միլիոնից ավելի մասնակից, ավելի քան 1200 ձերբակալված

Ֆրանսիայում վերջին մի քանի շաբաթներին շարունակվող զանգվածային բողոքի ցույցերի հերթական ալիքին, որոնք պայմանավորված են կենսապահովման ծախսերի աճով, շաբաթ՝ հոկտեմբերի 17-ին, մասնակցել է շուրջ 550 հազար մարդ։ Այս մասին հայտնել է երկրի ներքին գործերի նախարար Լորան Նունյեսը։ Նրա տվյալներով՝ նրանցից շուրջ 110 հազարը դուրս է եկել Փարիզի փողոցներ։ Ֆրանսիայի խոշորագույն արհմիության՝ Աշխատանքի համընդհանուր կոնֆեդերացիայի (CGT) տվյալներով, որը ցույցերի կազմակերպիչներից մեկն է, մասնակիցների թիվը կազմել է շուրջ 800 հազար, փոխանցում է DW-ն։

Ցույցեր են անցկացվել երկրի մի շարք խոշոր քաղաքներում։ Բացի Փարիզից, իշխանությունների ներքին քաղաքականության դեմ իրենց դժգոհությունն են արտահայտել նաև Լիոնի, Մարսելի, Թուլուզի, Լիլի, Ստրասբուրգի, Լիմոժի, Բորդոյի և Գրենոբլի բնակիչները։ Որոշ վայրերում բողոքի ակցիաներն ուղեկցվել են թալանով, հրկիզումներով և գույքի վնասմամբ։ Ֆրանսիայի վարչապետ Սեբաստիան Լըկորնյուն շաբաթ ուշ երեկոյան հայտնել է, որ ամբողջ երկրում բողոքի ցույցերի ընթացքում ձերբակալվել է 1200 մարդ։ Նրա խոսքով՝ ցուցարարների հետ բախումների հետևանքով 150 ոստիկան վիրավորվել է։

Փարիզում, Լիոնում և Ստրասբուրգում իրավապահները ցուցարարների դեմ արցունքաբեր գազ են կիրառել։ Բացի այդ, մայրաքաղաքում ձերբակալվել է շուրջ 100 մարդ, որոնց մոտ զենք և այլ արգելված իրեր են հայտնաբերվել։

Մարսելում ցուցարարները ներխուժել են քաղաքապետարանի շենք, ջարդուփշուր արել մի քանի խանութ և փորձել ներխուժել ոստիկանության բաժանմունք։ Լիոնում հրկիզվել է զբոսաշրջային տեղեկատվական կենտրոնը, Ավինյոնում ցուցարարները ներխուժել են պրեֆեկտուրայի ներքին բակ, իսկ Գրենոբլում վնասել են քաղաքապետարանի շենքը։ Լիմոժում հրկիզվել է շուրջ 140 տարի առաջ կառուցված քաղաքապետարանի շենքը, ինչի հետևանքով փլուզվել է զանգակատունը։

Բողոքի ցույցերի մասնակիցների թիվը զգալիորեն գերազանցել է իշխանությունների սպասումները։ Նրանց գնահատմամբ՝ հոկտեմբերի 17-ին Փարիզի փողոցներ կարող էր դուրս գալ շուրջ 40 հազար մարդ, իսկ երկրի մյուս շրջաններում ցուցարարների ընդհանուր թիվը պետք է կազմեր մոտ 150 հազար։ Այս ֆոնին շաբաթ երեկոյան Ֆրանսիայի կառավարությունն արտակարգ խորհրդակցություն է անցկացրել։ Լըկորնյուն անկարգությունների պատասխանատվությունը վերագրել է «ծայրահեղ ձախ խմբավորումներին»։

«Նրանց, ովքեր ցանկանում են այս բռնությունն օգտագործել որպես «նախավարժանք»՝ նախագահական ընտրություններից առաջ, ուղիղ ասում եմ՝ մենք թույլ չենք տա մեզ վախեցնել։ Ոչ ոքի չի հաջողվի բռնության միջոցով պարտադրել իր քաղաքական օրակարգը»,- գրել է նա X սոցիալական ցանցում։

Բողոքի ցույցերին անդրադարձել է նաև երկրի նախագահ Էմանուել Մակրոնը։

«Մեր հանրապետությունում բռնության համար տեղ չկա։ Նրանք, ովքեր ջարդեր են իրականացրել, հարձակվել պրեֆեկտուրաների ու խանութների վրա, թալանել նույնիսկ մեր քաղաքապետարանները, պատասխանատվության կենթարկվեն և կպատժվեն»,- ընդգծել է Մակրոնը X-ում։

Reuters գործակալության հաղորդմամբ՝ կենսապահովման ծախսերի աճը շաբաթ օրը Բելգիայում, Պորտուգալիայում և Իտալիայում նույնպես բողոքի ցույցերի պատճառ է դարձել։

Բրյուսելում անցկացված ակցիաներին մասնակցել է մի քանի հարյուր մարդ, տեղի են ունեցել բախումներ իրավապահների հետ։ Լիսաբոնում, որտեղ բողոքի ցույցերը շարունակվում են արդեն մի քանի օր, հոկտեմբերի 17-ին փողոցներ են դուրս եկել տասնյակ հազարավոր մարդիկ։

Իտալական Միլան քաղաքում ցույցերը վերածվել են անկարգությունների, ոստիկանությունն արցունքաբեր գազ է կիրառել։ Բոլոնիայում իրավապահներն օգտագործել են ջրցան մեքենաներ և ձերբակալել յոթ մարդու։

Բացի այդ, հոկտեմբերի 17-ին հերթական բողոքի ցույցերն են անցկացվել նաև Ալբանիայում։ Դրանց մասնակիցները քննադատել են կառավարությունում առկա կոռուպցիան, աշխատատեղերի կրճատումը և կրթության ցածր որակը։