Քաղաքականություն
03.05.2019 | 21:06Factor.am-ի հարցազրույցը Վայոց ձորի մարզպետ Տրդատ Սարգսյանի հետ
– Պարո՛ն Սարգսյան, Ձեր ղեկավարած մարզում վերջին ուշագրավ իրադարձությունը փոխմարզպետի և ԲՀԿ խմբակցության պատգամավոր Սերգեյ Բագրատյանի միջև միջադեպն էր: Որպես մարզպետ՝ ինչպե՞ս եք գնահատում այդ միջադեպի հանրայնացումը:
– Հանրայնացումը ճիշտ եմ գնահատում, միջադեպը՝ բացասական: Ինչու եմ ճիշտ գնահատում հանրայնացումը, որովհետև յուրաքանչյուր արարք պետք է արժանվույն գնահատական ստանա և պատժվի օրենքով սահմանված կարգով:
– Այսինքն՝ հնարավոր չէ՞ր հարցը լուծել՝ առանց մամուլի ուշադրության կենտրոնում հայտնվելու: Մի տեսակ տպավորություն է, որ փոխմարզպետն իր մասին մամուլին իմաց տվեց հենց այս միջադեպով: Արդյո՞ք չկային այլ կարևոր խնդիրներով, դրանց լուծման տեսլականով մամուլի ուշադրությունն իր վրա սևեռելու տարբերակներ:
– Հաղորդում էր տրվել ոստիկանություն, հենց ոստիկանությունն էլ հանրայնացրել էր: Ինչ վերաբերում է փոխմարզպետին, նման բան չկա: Վայոց ձորում բոլորը փոխմարզպետին ճանաչում են, կարող է՝ վատ թեմայի արդյունքում ավելի հանրայնացավ: Բայց մենք նման խնդիր չունենք՝ սև PR-ով ավելի հայտնի դառնալու: Պարոն Տոնոյանը լավ է աշխատում մարզում, տարբեր բացահայտումներ է կատարում, որի արդյունքում էլ նրանից դժգոհություն կա: Նկատի ունեմ՝ անհատների, չարաշահում կատարած մարդկանց, համայնքի ղեկավարների կողմից: Իմ կարծիքով՝ նույն պարոն Բագրատյանն էլ զոհ է դարձել նման համայնքների ղեկավարների ներկայացմանը: Պարոն Տոնոյանն ու պարոն Բագրատյանը չեն ճանաչել իրար, դա իրենց առաջին հանդիպումն է եղել: Այսինքն՝ պարոն Բագրատյանին, երևի, ներկայացրել են, թե ինչ վատն է փոխմարզպետը և նախատրամադրվածություն են սերմանել, խմիչքն էլ այդ առիթը ստեղծել է:
– Ի դեպ՝ փոխմարզպետն ալկոհոլի թեստ էր հանձնել: Արդյունքները կա՞ն:
– Վստահ եմ, որ արդյունքը բացասական է լինելու, որովհետև փոխմարզպետն առավոտից ինձ հետ է եղել, և մենք ալկոհոլ չենք օգտագործել:
– Առհասարակ ԲՀԿ-ի և «Իմ քայլի» հարաբերությունները լարված են: Այդ լարվածությունը նկատելի է Կոտայքի մարզում, որտեղ ԲՀԿ-ի դիրքերն ամուր են, հիմա այդ լարվածությունը նկատելի է նաև Ձեր ղեկավարած մարզում, որտեղ ևս ԲՀԿ-ի դիրքերն ամուր են. Սերգեյ Բագրատյանը նախկին մարզպետն է, ունեք ԲՀԿ-ական քաղաքապետ: Կարծում եք՝ սա շարժառիթ չէ՞ր:
– Իմ կարծիքով՝ վայոցձորցիները վերջին ընտրություններով հստակ հայտնեցին, թե որ կուսակցությունն ինչ հիմքեր ունի Վայոց ձորում: ԲՀԿ-ն բավական քիչ ձայն էր ստացել մեր մարզում: Այսինքն՝ նման խժդժություններ չկան մարզում: Համայնքների բոլոր ղեկավարների հետ աշխատում ենք նույն կերպ, տարբերություններ չենք դնում, միայն թե համայնքի ղեկավարն աշխատի ի շահ համայնքի:
– Ձեր նշանակման հետ կապված խոսվում էր այն մասին, որ Նիկոլ Փաշինյանի ընտրությունը Ձեզ վրա կանգ առավ, քանի որ Դուք Հանրային ռադիոն «գրավելու» գործում մասնակցություն եք ունեցել, դուռ եք կոտրել: Նման լուրերին ինչպե՞ս եք վերաբերվում:
– Ես 2015 թվականից «Քաղաքացիական պայմանագիր» կուսակցության անդամ եմ, մասնակցել եմ մեր կազմակերպած բոլոր ակցիաներին, բոլոր նախաձեռնություններին, ընտրությունների վերահսկողությանը: 2018-ին Վայոց ձորում եղել եմ «Ելք» դաշինքի ներկայացուցիչը: Ճանաչել, վստահել, նշանակել են:
Հարցազրույցն ամբողջությամբ՝ տեսանյութում:
Աղավնի Սուքիասյան
