Հարավային Կորեան և Թուրքիան պայմանավորվել են խորացնել համագործակցությունը միջուկային էներգետիկայի և պաշտպանության ոլորտներում

Հարավային Կորեան և Թուրքիան երեքշաբթի Սեուլում երկու երկրների առաջնորդների միջև կայացած գագաթնաժողովի ընթացքում պայմանավորվել են խորացնել համագործակցությունը միջուկային էներգետիկայի և պաշտպանության ոլորտներում, գրում է Turkish Minute-ը։

Թուրքիայի նախագահ Ռեջեփ Թայիփ Էրդողանը, որը այցով գտնվում է Հարավային Կորեայում, համատեղ մամուլի ասուլիսի ժամանակ հայտարարել է, որ միջուկային էներգետիկայի վերաբերյալ ստորագրված փաստաթղթերը, որոնք հիմնվում են ավելի վաղ ձեռք բերված փոխըմբռնման հուշագրի վրա, «ավելի կխորացնեն այդ համագործակցությունը»։

2025 թվականի նոյեմբերին ստորագրված հուշագիրը հիմք է ստեղծել Թուրքիայի Սինոփ քաղաքում նախատեսվող ատոմակայանի նախագծի շուրջ համագործակցության համար։ Այդ նախագծին մասնակցելու նպատակով հետաքրքրություն են ցուցաբերում հարավկորեական ընկերությունները։

Երկու կողմերը համաձայնել են, որ «Թուրքիայի Սինոպ ատոմակայանի նախագծի շուրջ համագործակցությունը սահուն է ընթանում», ասել է Հարավային Կորեայի նախագահ Լի Ջե Մյունգը։ Նա հավելել է, որ երեքշաբթի ստորագրվել է ևս մեկ փոխըմբռնման հուշագիր՝ «միջուկային էներգետիկայի նախագծերի ֆինանսավորման վերաբերյալ՝ հարավկորեական ընկերությունների մասնակցությանը աջակցելու համար»։

Պաշտպանության ոլորտում Լին ասել է, որ երկու երկրները համաձայնել են «խորացնել պաշտպանական համագործակցությունը՝ ընդլայնելով համատեղ արտադրությունը և տեխնոլոգիական համագործակցությունը, միաժամանակ ուսումնասիրելով երկու երկրների ընկերությունների համար երրորդ երկրների շուկաներ համատեղ մուտք գործելու հնարավորությունները», առանց մանրամասնելու։

Էրդողանը, նշելով կիսահաղորդիչների և տեխնոլոգիական այլ ոլորտներում Հարավային Կորեայի փորձի նկատմամբ Թուրքիայի հետաքրքրվածությունը, առանձնացրել է պաշտպանական ոլորտը՝ որպես մի ուղղություն, որտեղ « ռազմավարական գործընկերությունն արդեն շոշափելի արդյունքներ է տվել»։

«Նախագահի հետ հանդիպման ընթացքում մենք ընդգծել ենք հաջողված համատեղ նախագծերի թիվն ավելացնելու անհրաժեշտությունը»,– ասել է Էրդողանը։ Նա անցյալ տարի միջուկային էներգետիկայի ոլորտում ձեռք բերված համաձայնագիրն անվանել է «այդ ուղղությամբ  համագործակցության կարևոր հիմք»։

Թուրքիայի և Հարավային Կորեայի միջև երկկողմ առևտրի ծավալը, որի հիմքում 2013 թվականին ուժի մեջ մտած ազատ առևտրի համաձայնագիրն է, անցյալ տարի հասել է ռեկորդային՝ 10,7 միլիարդ դոլարի։

Թարգմանությունը՝ Էմմա Չոբանյանի