Իրեն թվում է` հեղափոխական, «Դուխով» կեպկայով Նիկոլն է. Աննա Գրիգորյան․ ՏԵՍԱՆՅՈՒԹ

ԱԺ «Հայաստան» խմբակցության ղեկավար Աննա Գրիգորյանը լրագրողների հետ ճեպազրույցում հայտարարեց, որ իրենք դեմ են քվեարկելու Սահմանադրության նոր նախագծին և չեն աջակցի այն հանրաքվեի դնելու առաջարկին։ Նրա խոսքով՝ հունիսի 7-ի ընտրություններում քաղաքացիներն արդեն արտահայտել են իրենց դիրքորոշումը Սահմանադրության փոփոխության հարցում, իսկ իրենց տրված մանդատը նման գործընթացին կողմ քվեարկելու հնարավորություն չի ենթադրում։

«Մեր ժողովուրդը մեզ մանդատ է տվել, որպեսզի թույլ չտանք, որ ընդունվի ալիևյան սահմանադրությունը։ Հետևաբար ակնկալել մեզանից, որ մենք կողմ քվեարկենք, որպեսզի դա դրվի հանրաքվեի, ուղղակի անհնար է»,- վստահեցրեց Գրիգորյանը։

Նրա խոսքով՝ ընդդիմությունը դեմ է ոչ թե Սահմանադրության ցանկացած փոփոխության, այլ Անկախության հռչակագրին հղումը հանելուն: Գրիգորյանը դա որակեց Ադրբեջանի պահանջ և հայտարարեց, որ այդ պատճառով էլ նախագիծն անվանում են «ալիևյան սահմանադրություն»։ Անդրադառնալով իշխանության կողմից հնարավոր ճնշումներին՝ պատգամավորն ասաց, որ ցանկացած դեպքում իրենց դիրքորոշումը չի փոխվի:

Նրա խոսքով՝ ընդդիմությունը պետք է պատրաստ լինի նաև համարժեք ճնշման մեխանիզմների մշակմանը՝ այդ թվում՝ բողոքի ակցիաների։ «Իրեն թվում է, թե ինքը դեռ հեղափոխական, «Դուխով» կեպկայով Նիկոլն է. իրավիճակ է փոխվել: 2018-2019 թվականները չպետք է համեմատել 2026-2027 թվականների հետ։ 18 թվականի Նիկոլը չկա, որովհետև 18 թվականի Հայաստանը չկա»,- ասաց ընդդիմադիր պատգամավորը:

Գրիգորյանի գնահատմամբ՝ Սահմանադրության փոփոխությունը չի երաշխավորի խաղաղության պայմանագրի ստորագրումը և չի կանխի Ադրբեջանի նոր պահանջները։

Մանրամասները` տեսանյութում:

Արփի Հակոբյան