27.10.2026 | 21:29
Մոջթաբա Խամենեին կարևորել է պատերազմը դադարեցնելու համար Իրանի պայմանների կատարումը
«Փրկե՛նք Ամուլսարը, պահպանե՛նք կենսաբազմազանությունը»․ խաղաղ ակցիա COP17-ի Կապույտ գոտում. ՏԵՍԱՆՅՈՒԹ
27.10.2026 | 19:25
«Դադարեցրե՛ք հանքարդյունահանումը Ամուլսարում»․ այս կոչով COP17-ի Կապույտ գոտում այսօր խաղաղ ակցիա անցկացվեց։ Ակցիայի մասնակիցները պահանջում էին դադարեցնել Ամուլսարի հանքի շահագործումը՝ բարձրաձայնելով ծրագրի հնարավոր բնապահպանական հետևանքների և տարածքի էկոհամակարգին հասցված վնասի մասին։
Բնապահպան Նազելի Վարդանյանի խոսքով՝ վերջերս Բեռնի կոնվենցիայի քարտուղարությունը որոշում է կայացրել անհապաղ դադարեցնել Ամուլսարում շինարարությունն ու հանքարդյունաբերական գործունեությունը՝ շրջակա միջավայրի վրա ազդեցության գնահատման բացակայության և տարածքի՝ զմրուխտե գոտի լինելու հանգամանքով պայմանավորված։
«Այդուհանդերձ, այս որոշումը հաշվի չի առնում նաև այն հանգամանքը, որ Ամուլսարի հանքի պաշտոնական բացումը տեղի է ունեցել COP-ից ընդամենը մեկ շաբաթ առաջ։ Սա անընդունելի է քաղաքացիական հասարակության համար, որը շուրջ 20 տարի պայքարում է այս ծրագրի դեմ։ Ընկերությունը 20 տարի շարունակ ներդրումներ է կատարել, սակայն հանքարդյունահանում չի սկսել։ Փոխարենը՝ ոչնչացրել է այդ տարածքի ամբողջ էկոհամակարգը։ Այդ պատճառով մենք շարունակաբար բողոքի ակցիաներ ենք կազմակերպում և պահանջում մեր կառավարությունից դադարեցնել հանքարդյունահանումը Ամուլսարում»,- հայտարարեց բնապահպան Նազելի Վարդանյանը։
Ակցիայի մասնակիցները ձեռքում պահել էին անգլերեն գրություններով պաստառներ՝ «Փրկե՛նք Ամուլսարը» (Save Amulsar), «Դադարեցրե՛ք Ամուլսարի հանքարդյունահանումը» (Stop Mining Amulsar), «Դադարե՛ք ձևացնել, սկսե՛ք պաշտպանել» (Stop Pretending, Start Protecting) և «Բնությունը՝ շահույթից վեր» (Nature Over Profit)։
Մանրամասները՝ տեսանյութում։
Արփի Հակոբյան
