Ղազախստանի մայրաքաղաք Աստանայում շարունակվող հունահռոմեական ոճի ըմբշամարտի աշխարհի առաջնության երրորդ մրցումային օրը պայքարի մեջ են մտել Հայաստանի վերջին ներկայացուցիչները՝ Կարեն Ասլանյանը (63 կգ), Սլավիկ Գալստյանը (67 կգ) և Գևորգ Թադևոսյանը (87 կգ), որոնք դուրս եկան կիսաեզրափակիչ:
Աշխարհի առաջնության բրոնզե մեդալակիր, Եվրոպայի առաջնության փոխչեմպիոն ու քառակի բրոնզե մեդալակիր Կարեն Ասլանյանը (63 կգ) կիսաեզրափակիչի ճանապարհին ոչ մի միավոր չտվեց մրցակիցներին՝ տանելով երեք հաղթանակ ժամանակից շուտ: Հայ ըմբիշը հաղթեց մոլդովացի Կորնելիու Ռուսուին (10:0), ղրղզ Աֆթանդիլ Տալաիբեկ Ուուլուին (8:0) և ուզբեկ Օզոդբեկ Խալիմբոևին (9:0):
Աշխարհի առաջնության կրկնակի ու Եվրոպայի առաջնության եռակի բրոնզե մեդալակիր Սլավիկ Գալստյանը (67 կգ) նույնպես պայքարը սկսեց որակավորման փուլից՝ 5:1 հաշվով հաղթելով Ֆրանսիան ներկայացնող հայ ըմբիշ Գագիկ Սնջոյանին: Երկրորդ գոտեմարտում Գալստյանը ժամանակից շուտ 10:0 հաշվով պարտության մատնեց մոլդովացի Վալենտին Պետրիչին, իսկ քառորդ եզրափակիչում 3:2 հաշվով առավելության հասավ նորվեգացի Հավարդ Յորգենսենի նկատմամբ:
Երեկոյան մրցահերթում հայ ըմբիշը եզրափակիչի ուղեգիրը կվիճարկի ուզբեկ Այտյան Խալմախանովի հետ:
Գևորգ Թադևոսյանը (87 կգ) որակավորման փուլում 6:3 հաշվով հաղթեց Ռուսաստանի ներկայացուցիչ Միլադ Ալիրզաևին, իսկ երկրորդ գոտեմարտում 4:1 հաշվով ուժեղ գտնվեց ղազախ Նուրսուլթան Տուրսինովից:
Քառորդ եզրափակիչում Թադևոսյանը մրցեց Նորվեգիան ներկայացնող Էկսաուս Մուկուբուի հետ ու հաղթեց 10:4 հաշվով:
Հունահռոմեական ըմբշամարտի Հայաստանի հավաքականը մրցավայր է մեկնել ամբողջական կազմով՝ 10 մասնակցով: Նորայր Հախոյանը (55 կգ), Սուրեն Աղաջանյանը (60 կգ), Աշոտ Խաչատրյանը (72 կգ), Մալխաս Ամոյանը (77 կգ), Սամվել Գրիգորյանը (82 կգ), Հայկ Խլոյանը (97 կգ) և Ռազմիկ Քուրդյանը (130 կգ) պարտություն են կրել ու ավարտել ելույթներն առանց մեդալի:
Դավիթ Եղիազարյան
