Իրանը պատրաստ է ԱՄՆ-ի հետ խաղաղ բանակցություններ վարել, եթե ամերիկյան կողմը կատարի հունիսին ձեռք բերված պայմանավորվածությունները։ Այս մասին հայտարարել է Իրանի նախագահ Մասուդ Փեզեշքիանը։
ԱՄՆ-ի և Իրանի միջև ավելի քան մեկ ամսվա ընթացքում առաջին անմիջական ռազմական բախումից մեկ օր անց նա նշել է, որ Թեհրանը «անմիջապես կարձագանքի», եթե ԱՄՆ-ը վերադառնա հունիսի 17-ին համաձայնեցված՝ խաղաղ բանակցությունների շրջանակի իր պարտավորություններին։
Փեզեշքիանը, երեքշաբթի օրը Ղրղզստանի մայրաքաղաք Բիշքեկում Շանհայի համագործակցության կազմակերպության գագաթնաժողովում ելույթ ունենալով, ԱՄՆ-ին մեղադրել է ժամանակավոր համաձայնագիրը խախտելու մեջ։
Փեզեշքիանի խոսքով՝ շրջանակային համաձայնագիրը գործել է երկու շաբաթից էլ պակաս, որից հետո Վաշինգտոնը սկսել է ներկայացնել «չափազանցված պահանջներ» և չի կատարել իր ստանձնած պարտավորությունները։ Փեզեշքիանը այդ համաձայնագիրը ստորագրել էր ԱՄՆ նախագահ Դոնալդ Թրամփի հետ։
«Ինքնին հասկանալի է, որ ԱՄՆ-ի կողմից ստանձնած պարտավորությունների խախտմանը Իրանը տվել է համապատասխան պատասխան»,- ասել է Փեզեշքիանը՝ առանց մանրամասնելու Թեհրանի ձեռնարկած միջոցները ու հավելել․ «Սակայն ես հստակ հայտարարում եմ, որ եթե ԱՄՆ-ը վերադառնա վերոհիշյալ փոխըմբռնման հուշագրով ստանձնած իր պարտավորությունների կատարմանը, Իրանի Իսլամական Հանրապետությունն անմիջապես կձեռնարկի փոխադարձ քայլեր»։
Նրա հայտարարությունները հնչում են այն ժամանակ, երբ ԱՄՆ-ը Իրանի նկատմամբ ուժեղացրել է տնտեսական ճնշումը՝ ԱՄՆ-ի և Իրանի միջև նոր ռազմական բախումից հետո։ Դոնալդ Թրամփը հայտարարել է, որ լայնածավալ նոր պատժամիջոցները «շատ ուժեղ կերպով սկսում են գործել»։
ԱՄՆ-ն և Իրանը կիրակի և երկուշաբթի գիշերը փոխանակվել էին հարվածներով՝ ավելի քան մեկ ամսվա ընթացքում առաջին անգամ, այն բանից հետո, երբ ամերիկյան ուժերը հարվածներ հասցրին Հորմուզի նեղուցի մոտակայքում, մինչդեռ Իրանը պատասխան հարված հասցրեց Հորդանանում գտնվող ամերիկյան բազաներին։
Ավելի վաղ Դոնալդ Թրամփը Fox News-ին հայտնել էր, որ ԱՄՆ-ը պատասխան հարված կհասցնի՝ հայտարարելով. «Մենք ուժեղ հարված կհասցնենք նրանց։ Պատասխան կլինի»։ Սակայն նա նաև նշել է, որ դիվանագիտության համար դեռ հնարավորություն կա՝ ասելով, որ Իրանը «շատ է ցանկանում հանդիպել»։
ԱՄՆ ֆինանսների նախարար Սքոթ Բեսենթը, ելույթ ունենալով Հյուսիսային Կարոլինայում G20-ի ֆինանսների նախարարների հանդիպման ընթացքում, նախազգուշացրել է, որ Իրանի հետ գործարքներ իրականացնողները կարող են զրկվել դոլարային ֆինանսական համակարգից օգտվելու հնարավորությունից։
«Կարծում եմ՝ նրանք ռազմական ճանապարհով են հակահարված տալիս, քանի որ տնտեսապես պարտվում են»,- ասել է Բեսենթը՝ այն ժամանակ, երբ Վաշինգտոնը փորձում էր միջազգային աջակցություն ստանալ Իրանի ֆինանսական կենսական ուղիները կտրելու իր արշավին։
Թարգմանությունը՝ Էմմա Չոբանյանի
