03.06.2026 | 14:22
«Մենք ոչ թե եվրոհակաՔրիստոս ենք, այլ եվրոմոնարխիստ ու եվրոկոմունիստ»․ Դանիել Իոաննիսյանը՝ ՌԴ ԱՀԾ հայտարարությանն ի պատասխան
ԲԱԶՈՒՄԻ ԲԱԶՈՒՄ ՀՈԳՍԵՐԻՑ ԿԱՐԵՎՈՐԸ․ Կյանքը նոր Հայաստանի հին գյուղերում․ մաս 18․ ՏԵՍԱՆՅՈՒԹ
Հասարակություն
22.11.2018 | 17:00
Լոռու մարզի Բազում գյուղը մարզկենտրոն Վանաձորից գտնվում է 3 կմ հեռավորության վրա: Հոգսաշատ այս գյուղում տարիներ շարունակ բազում չլուծված խնդիրներ են կուտակվել: 170 տարվա պատմություն և 1000 բնակիչ ունեցող այս համայանքում մինչ օրս օգտվում են խմելու համար ոչ պիտանի և խիստ վտանգավոր ջրից:
Խմելու ջի բացակայությունը գյուղի թերևս ամենագլխավոր խնդիրն է: Բազումցիների համար, սակայն, ոչ պակաս կարևոր է գյուղում մշակութային կյանքի բացակայությունը: Ավելի քան 30 տարի է՝ գյուղը մշակույթի տուն չունի: «Ես արդեն 53 տարի է՝ ապրում եմ այստեղ, ունեմ երկու թոռնուհի, իրենք սովորում են, ձգտումներ ունեն, բայց բավական մեծ գյուղ է ու մշակույթի տուն չկա: Մենք ինչո՞վ ենք մեղավոր»,- ասում է տիկին Մարուսը:
69-ամյա Մարուս Ծատուրյանը առողջական խնդիրներ ունի, ապրուստի միակ միջոցը հաշմանդամության համար տրվող նպաստն է: Տիկին Մարուսը թոռնուհիներին տաբեր մշակութային խմբակներ ուղարկելու համար անհրաժեշտ ֆինանսական միջոցներ չունի:
«Գեղեցիկ կլիներ, որ մեր գյուղում լիներ մշակույթի տուն, մեր երեխենք էլ հաճախեին, բայց չկա, իսկ ես էլ հնարավորություն չունեմ, որ ամեն օր տանեմ-բերեմ, աղջիկ էրեխեք են: Ի՞նչ կարող եմ անել, ամեն ինչ ֆինանսի հետ կապված ա»,- ցավով նշում է մեր զրուցակիցը, ապա հավելում. «Ես իմ էրեխեքին ո՛չ թատրոն եմ տարել, ո՛չ կինո, միայն սպորտի է երեխան գնացել»: Մարուս Ծատուրյանի հարսը տարիներ առաջ մահացել է, երկու թոռնուհիների խմանքը մնացել է նրա ուսերին: Աղջիկները դժվարությամբ են հիշում, թե վերջին անգամ երբ են թատրոն կամ կինո հաճախել:
«Թատրոն գնացել եմ 5 տարի առաջ՝ առաջին դասարանում, բայց դրանից հետո տատիկս հնարավորություն չի ունեցել ինձ տանել»,- խոստովանում է տասնամյա Միլենան: Խորհրդային տարիներին գյուղում գործող մշակույթի տունը քանդվել է 1988 թվականի երկրաշարժից: 2013 թվականին մշակույթի տան տեղում կառուցվել է համայնքապետարանի շենքը: Շենքում տեղակայված է նաև մանկապարտեզ:
«Գյուղն ունեցել է մշակույթի տուն, խմբակներ, երկրաշարժից հետո ոնց որ նախնադարյան գյուղ լինի: Մշակույթի տան շատ խիստ պահանջ ունենք»,- ասում է 67-ամյա Բալասան Սելիմյանը: Համայնքի բյուջեն կազմում է շուրջ 41 մլն դրամ։ Բազումցիները նոր իշխանություններից մեծ ակնկալիքներ ունեն: Հույս ունեն, որ կառավարությունը կլուծի մշակույթի տան հարցը:
Մանրամասները՝ տեսանյութում։
