Տեսեք, սա մեր լեգիտիմ սահմանն է. Փաշինյանը` Կիրանցի պատի տակ. ՏԵՍԱՆՅՈՒԹ

ՀՀ վարչապետ Նիկոլ Փաշինյանը այցելել է Տավուշի մարզի Կիրանց գյուղ՝ ՀՀ քաղաքացիների մոտ 50 հոգանոց խմբի հետ։ Նա ցուցադրել է սահմանազատված հատվածը և կառուցված սահմանապահ պատը։

Փաշինյանը նշել է, որ անվտանգության ապահովման թիվ մեկ երաշխիքը միայն բանակը չէ։ Ըստ նրա՝ լեգիտիմությունը անվտանգության ապահովման կարևորագույն գործիքն է։

«Եթե անվտանգության թիվ մեկ պատկերացումը բանակն է, երկրորդը բանակն է… ուրեմն անվտանգություն գոյություն չունի։ Այս պատը, որի հետևում 50 մետր այն կողմ Ադրբեջանն է, մեր անվտանգության ապահովման գործիքն է»,- ասել է վարչապետը։

Վարչապետը կրկին անդրադարձել է տարածքային ամբողջականության ճանաչման թեմային՝ այն համեմատելով «կադաստրի վկայականի» հետ։ Նա բացատրել է, որ Ադրբեջանի տարածքային ամբողջականությունը ճանաչվել է նրա համար, որպեսզի Ադրբեջանն էլ ճանաչի Հայաստանի 29,743 քառ. կմ տարածքը։

«Իմ լիազորությունները այստեղ ավարտվում են»,- ցույց տալով սահմանային պատը՝ նշել է Փաշինյանը։

Հակադարձելով նախկինում հնչող քննադատություններին, թե սահմանազատումից հետո գյուղը կդատարկվի կամ դպրոցը չի գործի՝ Փաշինյանը ցույց է տվել դպրոցի շենքը, որը գտնվում է սահմանից ընդամենը մի քանի տասնյակ մետր հեռավորության վրա։

«Դպրոցում արդեն մեկ տարի է՝ դաս են անում, և ոչ մի միջադեպ չի արձանագրվել»։

Վարչապետը ընդգծել է, որ այս հատվածում ՊՆ բանակային կորպուսին փոխարինել են սահմանապահ զորքերը։ Նրա խոսքով՝ Հայաստանի և Ադրբեջանի սահմանապահ զորքերը պայմանավորվել են ծառայությունն իրականացնել առանց ինքնաձիգների վրա պահունակների, սաղավարտների և զրահաբաճկոնների։

Փաշինյանը նշել է, որ Կիրանցում կյանքը ոչ միայն շարունակվում է, այլև ակտիվանում։ Բացի այդ, կառավարության ֆինանսավորմամբ վերականգնվում է գյուղի՝ 100 տարի ավերակ վիճակում գտնվող եկեղեցին։

Կոնֆիդենցիալության պայմաններում քաղաքացիներին ներկայացվել են նաև վերջին տարիներին ձեռք բերված սպառազինությունը և տեխնիկան, ինչպես նաև ինժեներական նորարարությունները: