Մեզնից շատերը լավ ապրելը քեֆերի մեջ են տեսնում, երբ շուրջը ատելություն և թշնամանք է. Սամվել Թոփալյան. ՏԵՍԱՆՅՈՒԹ

«Այսօր մեր հայրենակիցներից շատերը լավ ապրելն ուտել-խմելու, քեֆերի մեջ են տեսնում, մինչդեռ պետք է հստակ սահմանել՝ որն է ապրելը, լավ ապրելը. ես չեմ կարող լավ ապրել, եթե շուրջս համատարած ատելություն և թշնամանք կա: Արվեստի դերն այդ թշնամանքը մաքրելը, զտելը պետք է լինի, այլապես չեմ կարծում, որ այդ մթնոլորտում կարող է որևէ դրական ու կարևոր բան ծնվել»,- Factor TV-ի հետ զրույցում նշում է դերասան Սամվել Թոփալյանը:

Նա նկատում է՝ կանգնած լինելով բազմաթիվ ներքին և արտաքին մարտահրավերների առջև՝ մեր հասարակությունը խառն է, շփոթված. «Մարդիկ չեն հավատում և չեն վստահում ոչ ոքի: Մենք պետք է վերագտնենք մեր մեջ հավատը, հստակ պատկերացնենք՝ ինչ է հայրենիքը: Այն ուղղակի բառ չէ, հայրենիք սիրելն այն է, երբ տուն ես կառուցում քո հողի վրա և ապրում ես այդ տան մեջ, երբ երեխա ես ունենում ու լավ ես դաստիարակում նրան»,-ասում է մեր զրուցակիցը:

Սամվել Թոփալյանն անդրադառնում է նաև հայաստանյան մշակութային կյանքին, մեր երկրում թատրոններ փակելու պրակտիկային. «Հանրության ուղեղում ներարկում են, թե թատրոնները բեռ են իրենց համար, մինչդեռ կայացած թատրոն փակելն, ինչպիսին, օրինակ, «Գոյ»-ն էր, կարծում եմ՝ մարդասպանության պես բան է: Պետությունը, եթե չի օգնում, կարող է գոնե չխանգարել»:

Դերասանը խոսում է Հայաստանում ձևավորված կինոմիջավայրի մասին: Նա տեսակետ է հայտնում, որ հայ ժամանակակից կինոն (խոսքը փառատոնային ֆիլմերի մասին չէ) հաճախ կտրված է հայկական իրականությունից. «Թեմաները կապ չունեն մեզ հետ: Պատճառաբանում են, թե նման ֆիլմերը գումար չեն բերում, բայց չեն էլ փորձում այդպիսիք նկարել»:

Մանրամասները՝ տեսանյութում:

Աննա Բաբաջանյան