Առաջընթաց չկա․ Թրամփը՝ Պուտինի հետ հեռախոսազրույցի մասին

ԱՄՆ նախագահ Դոնալդ Թրամփը հայտարարել է, որ Ռուսաստանի նախագահ Վլադիմիր Պուտինի հետ հեռախոսազրույցի ընթացքում  առաջընթացի չի հասել Ուկրաինայում ռուսական պատերազմի ավարտի հարցում, գրում է DW-ի ռուսական ծառայությունը։

«Դա բավականին երկար զրույց էր, մենք խոսել ենք շատ բաների մասին, այդ թվում՝ Իրանի, ինչպես նաև, ինչպես գիտեք, Ուկրաինայի հետ պատերազմի մասին։ Եվ ես հիացած չեմ։ Ես նրա [Պուտինի] հետ որևէ առաջընթաց չեմ գրանցել»,- Վաշինգտոնի մոտ գտնվող Էնդրյուս ռազմաբազայում լրագրողներին ասել է Թրամփը։

Բացի այդ, ամերիկացի առաջնորդի պնդմամբ՝ Միացյալ Նահանգները շարունակում է զենք մատակարարել Կիևին։

«Մենք զենք տալիս ենք, աշխատում ենք նրանց [ուկրաինացիների] հետ և փորձում ենք օգնել։ Գիտեք՝ Բայդենը դատարկել է մեր երկիրը՝ նրանց զենք տալով, և մենք պետք է համոզվենք, որ ինքներս բավարար քանակությամբ զենք ունենք»,- ասել է Թրամփը։

Կրեմլի հաղորդմամբ՝ Պուտինի և Թրամփի միջև հունվարից ի վեր վեցերորդ պաշտոնական հեռախոսազրույցը հուլիսի 3-ին տևել է գրեթե մեկ ժամ։ Գործիչները քննարկել են նաև Սիրիայում, Իրանում և Մերձավոր Արևելքում տիրող իրավիճակը, ասել է ՌԴ նախագահի օգնական Յուրի Ուշակովը։

Անձնական հանդիպման մասին խոսք չի եղել, սակայն, ըստ Ուշակովի, «գաղափարն օդում է»։

Նախորդ զրույցը տեղի է ունեցել հունիսի կեսերին, երբ Պուտինը առաջարկել էր միջնորդել Մերձավոր Արևելքի կարգավորման գործում։ Բրիտանական Financial Times-ի տվյալներով՝ Թրամփը հուլիսի 4-ին հեռախոսազրույց կունենա նաև Ուկրաինայի նախագահ Վլադիմիր Զելենսկիի հետ։ Ուկրաինացի պաշտոնյաները AFP գործակալությանը հաստատել են, որ Կիևում այս զանգի համար «նախապատրաստական ​​աշխատանքներն արդեն ընթացքի մեջ են»։

Politico-ն, հղում անելով երեք աղբյուրի, հուլիսի 1-ին հաղորդել էր, որ Պենտագոնը սառեցրել է Patriot հակաօդային պաշտպանության հրթիռների, Hellfire հրթիռների և այլ ճշգրիտ կառավարվող հրետանային զինամթերքի մատակարարումները Կիևին՝ մտահոգությունների պատճառով, որ այդ զենքի ամերիկյան պաշարները չափազանց փոքր են: Լրատվամիջոցի համաձայն՝ այս զենքի մատակարարումները Կիևի հետ համաձայնեցվել են Բայդենի վարչակազմի կողմից:

Սպիտակ տան պաշտոնյան հաստատել է, որ Թրամփի վարչակազմը դադարեցնում է Ուկրաինային որոշ զինատեսակների, այդ թվում՝ հակաօդային պաշտպանության հրթիռների մատակարարումները՝ ռազմական ծախսերի և օտարերկրյա պետություններին ամերիկյան աջակցության վերանայումից հետո։

Թարգմանությունը՝ Էմմա Չոբանյանի