«Թափանցիկ» ու «հաշվետո՞ւ». Փաշինյանի մասնակցությամբ համաժողովին հրավիրվել են միայն պետական ֆինանսավորմամբ ԶԼՄ-ները

Այսօր վաղ առավոտից ՀՀ վարչապետ Նիկոլ Փաշինյանի, Գլխավոր դատախազ Աննա Վարդապետյանի, Արդարադատության նախարար Սրբուհի Գալյանի, Բարձրագույն դատական խորհրդի նախագահ Արթուր Աթաբեկյանի, Վճռաբեկ դատարանի նախագահ Լիլիթ Թադևոսյանի և մի շարք այլ բարձրաստիճան պաշտոնյաների մասնակցությամբ մեկնարկել է «Արդարադատությունը որպես արդարության հասնելու գործիք» խորագրով համաժողովը։

«Ժողովրդավարության բաստիոն» հռչակված Հայաստանում, սակայն, խիստ սուբյեկտիվ են վերաբերվել լրատվամիջոցներին և միայն ընտրովի են հրավիրել մեդիայի ներկայացուցիչներին։ Տարիներ շարունակ ամենախնդրահարույցներից մեկը համարվող արդարադատության ոլորտի խնդիրների վեր հանմանը և բարեփոխումներին ուղղված լայնածավալ քննարկմանը հրավեր է ուղարկվել միայն Հանրային հեռուստաընկերությանը, «Արմենպրես» լրատվական գործակալությանը և «Ֆոտոլուր»-ին։ Ինչո՞ւ է սահմանափակվել այլ լրատվամիջոցների մասնակցությունը, Արդարադատության նախարարի մամուլի խոսնակը պատճառաբանում է՝ դահլիճն է փոքր եղել.

«Հաշվի առնելով միջոցառման առանձնահատկություններն ու դահլիճի տեխնիկական հնարավորությունները, ելնելով միջոցառմանը մասնակցող հյուրերի թվից` ավելի քան 150, որոշում է կայացվել հրավիրել մի քանի ԶԼՄ:

Ցանկանում եմ շեշտել, որ այս որոշումը կայացվել է՝ հաշվի առնելով դահլիճի սահմանափակ տեխնիկական հնարավորությունները: Ավելորդ է խոսել այն մասին, որ սա խտրական մոտեցում է ԶԼՄ գործընկերների նկատմամբ:

Լիահույս եմ, որ հաջորդիվ կփորձենք ապահովել հետաքրքրված բոլոր ԶԼՄ-ների ներկայացուցչությունը»,- Factor․am-ի հետ զրույցում ասաց Մարիամ Մելքումյանը։

Նշենք, որ հասարակական կազմակերպությունների և քաղհասարակության ներկայացուցիչների թիվը ևս շատ չէ։ Թե ովքեր են ավելի քան 150 հյուրերը և ում մասնակցությանն է նախապատվություն տրվել ԶԼՄ ներկայացուցիչների փոխարեն՝ չի հաղորդվում։

Երբ կլինի հաջորդ համաժողովը և արդյոք այդ ժամանակ իրապես կապահովի բոլոր հետաքրքրված լրատվամիջոցների մուտքը, պարզ չէ։

Նկատենք, որ համաժողովի մեկնարկին՝ Փաշինյանի մտնելուց քիչ անց, մի ամբողջ երգչախումբ կատարեց ՀՀ օրհներգը։ Այստեղ արդեն հարց է առաջանում՝ ինչպե՞ս է ստացվում, որ ավելի քան 10 հոգուց բաղկացած երգչախմբին հնարավոր է լինում տեղ գտնել մեծ դահլիճում, իսկ դատաիրավական ամենակարևոր միջոցառումներից մեկը լուսաբանել ցանկացող լրատվամիջոցների համար բավարար տարածք չի եղել։

Ռոզա Վարդանյան