Փոշի՞ն է մնայուն, թե՞ Կասկադը․ ինչ է «թաքցնում» մայրաքաղաքում հայտնված նոր պաստառը. ՏԵՍԱՆՅՈՒԹ

Փոշին ժամանակավոր է, մեծ գաղափարները՝ մնայուն։ Նման բովանդակությամբ պաստառ է հայտնվել Սարյան փողոցում գտնվող աստիճաններին հարակից տարածքում։ Պաստառի վրա նաև Կասկադի պատկերն է։ Արդյո՞ք սա ակնարկ է, որ երևանցիները պետք է հոգեբանորեն պատրաստ լինեն, որ Կասկադի վերակառուցման աշխատանքների ընթացքում մայրաքաղաքի՝ առանց այդ էլ փոշոտ օդում փոշու պարունակության զգալի գերազանցումներ են լինելու։  

Կասկադի, Օպերայի և ԱԳՆ-ի նախկին շենքի գրաֆիկական պատկերները և արտասովոր բովանդակությամբ տեքստը մասնագիտական հանրույթի շրջանում վրդովմունք է հարուցել։ Երևանի ժառանգության պաշտպանության կոմիտեի անդամ Իզաբելլա Սարգսյանն ասում է՝ այն զավեշտալի է և երևանցիներին ուղղված վատ PR։ 

Պաստառով առանձնացված է Սարյան փողոցի մայթեզրին իրականացվող ճանապարհաշինական աշխատանքների հատվածը։ Սարգսյանի խոսքով՝ հասկանալի չէ, թե ինչու են պաստառի վրա պատկերված իրական մնայուն արժեքների պատկերներ։ 

Կենտրոն վարչական շրջանը, «Կերոն» զարգացման հիմնադրամը և «Մանե Թայլս» ընկերությունը համատեղ նախաձեռնել են Մարտիրոս Սարյանի անունը կրող փողոցի գլխավոր աստիճանների և հարակից տարածքի բարեկարգման ծրագիրը։ Այս մասին Factor TV-ին փոխանցում են Երևանի քաղաքապետարանից: 

«Կերոն» զարգացման հիմնադրամից Factor TV-ին հայտնեցին, որ Սարյան փողոցի աստիճանների հարակից տարածքում տեղադրված շինարարական պաստառների վրա առկա շինությունների գրաֆիկական պատկերները ստացվել են արհեստական բանականության օգնությամբ։ Ըստ հիմնադրամի՝ շինհրապարակի պաստառների գրությունները և դիզայնը մշակվել են՝ պաստառներն ավելի գրավիչ դարձնելու և ժամանակավոր անհարմարության համար քաղաքացիների համբերությունն ու ներողամտությունը խնդրելու նպատակով։  

Իսկ արդո՞ք այստեղ ակնարկ կա Կասկադում սպասվող շինարարական աշխատանքների մասին։ Համալիրի վերակառուցման աշխատանքներն իրականացնելու է «Ջի Թի Բի դիվելոփմենթ» ՍՊԸ-ն։ Նախատեսվում է 20 մլրդ 46 մլն դրամի ներդրում, իսկ նախագիծն ամբողջությամբ նախատեսվում է ավարտել 5 տարում։ Այդ ընթացքում շինարարական աշխատանքների հետևանքով փոշու քանակը մայրաքաղաքի կենտրոնում արդյո՞ք կառավարելի կլինի՝ հաշվի առնելով նաև քամու ուղղությունը։ Ընկերության հիմնադիր Գրիգոր Տեր-Ղազարյանը Factor TV-ի այս հարցադրումները չմեկնաբանեց, միայն փոխանցեց, որ երբ ժամանակը գա, հանդես կգան համապատասխան հայտարարությամբ։

Մինչ այդ, Երևանի օդում փոշու պարունակությունը պարբերաբար գերազանցում է թույլատրելի կոնցենտրացիան։ Փետրվարի 26-ից մարտի 4-ը բոլոր օրերին Կենտրոն վարչական շրջանում այդպիսի պատկեր է արձանագրվել։ Ըստ ՅՈՒՆԻՍԵՖ-ի՝ օդի աղտոտվածությունը թե՛ ներսում, թե՛ դրսում կարող է առաջացնել շնչառական հիվանդություններ, այն մինչև հինգ տարեկան երեխաների մահվան 10 դեպքից 1-ի պատճառն է։ ԱՀԿ տվյալների համաձայն՝ յուրաքանչյուր տարի աշխարհում շուրջ 7 միլիոն մարդ է մահանում օդի աղտոտվածության պատճառով։

Մանրամասները՝ տեսանյութում։

Անի Թամրազյան