Հասարակություն
05.03.2025 | 15:59
Շիրակի մարզի Աշոցք խոշորացված համայնքի Կրասար բնակավայրի ֆերմերներն ահազանգում են, որ շուրջ 270 գլուխ կով վարակված է բրուցելոզով։
Ֆերմեր Բաբկեն Սահակյանը Factor.am-ին հայտնեց, որ Սննդամթերքի անվտանգության տեսչական մարմնի մարզային տեսուչները փետրվարին խոշոր եղջերավոր անասուններից արյան անալիզ են վերցրել, որի արդյունքում իր անասնաֆերմայում բրուզելոզ է հաստատվել։
«50 գլուխ կովից 37-ի մոտ բրուցելոզ է հաստատվել։ Սաղ գեղին կա, մենակ մերը չէ, ով 10 հատ կով ունի, 10-ի մոտ էլ բրուցելոզ են հաստատել»,- ասաց ֆերմերը։
Կրասարի բնակիչներն ասում են՝ անասնապահությունն իրենց ապրուստի հիմնական միջոցն է։ Ըստ գյուղացիների՝ բրուցելոզը գյուղի ոչ մի անասնաֆերմա չի շրջանցել:
Բրուցելոզ հաստատվել է նաև ֆերմեր Կորյուն Հովհաննիսյանի խոշոր եղջերավոր անասունների մոտ։ Նրա փոխանցմամբ՝ իր ֆերմայից 39 խոշոր եղջերավոր կենդանուց նմուշառում են վերցրել, 33-ի մոտ բրուցելոզ է հայտնաբերվել։ Ֆերմերը, սակայն, չի հավատում լաբորատորիայի պատասխաններին։ Նա նաև նկատում է, որ դեկտեմբերին կենդանիներից դարձյալ նմուշառում էին վերցրել, բայց կովերի մոտ ոչ մի վարակիչ հիվանդություն չէր հաստատվել:
«Դեկտեմբերին արյուն են վերցրել ու ասել, որ քո անասունները մաքուր են: Փետրվարին նորից են եկել, մտել իմ ֆերմա, արյուն են վերցրել ու երկու օր հետո ասում են՝ հիվանդություն կա: Կովերը մի ամիս է՝ նույն տեղում կապած են, դուրս չեն եկել, որտեղի՞ց էդ հիվանդությունը: Դուք լինեք իմ տեղը կհավատա՞ք: Չեմ տեսել այս արյունը տարե՞լ են լաբորատորիա, թե՝ ոչ: Հենց իմ ֆերմայից դուրս են եկել, իմ իրավունքները սահմանափակվել են, չգիտեմ՝ ուր են տարել, ստուգե՞լ են, չեն ստուգել»,-տարակուսեց անասնապահը։
Ֆերմերի խոսքով՝ պատկան մարմիններն իրենց ասել են, որ բրուցելոզով վարակված կենդանիները պետք է հարկադիր սպանդի ենթարկվեն:
«Մի կգ միսը սպանդանոցը 500-600 դրամով է ուզում: Մի կովն առել եմ 1 մլն 200 հազար դրամ, էդ կովը մորթեցի, վաճառեցի, գումարը 100 հազար դրամ փող է կազմելու։ Հիմա վատ շրջան է, կովը ծնել է, վրեն միս չկա, ոսկոր է: Ամբողջ տարին չարչարվել ենք, վարկով փող ենք վերցրել կեր ենք առել, սպասում ենք, որ կովը ծնի, հորթն ու կաթը վաճառենք, գումար աշխատենք, գալիս ասում են՝ հիվանդ է, պետք է հարկադիր մորթի ենթարկես»,- դժգոհեց Կորյուն Հովհաննիսյանը։
Կրասարում արձանագրված բրուցելոզի դեպքերի հետ կապված էկոնոմիկայի նախարարի մամուլի քարտուղար Լիլիթ Շաբոյանը Factor.am-ին հայտնեց, որ այժմ ձևավորվել է աշխատանքային խումբ։ Նա մանրասնեց, որ աշխատանքային խմբի շրջանակներում մարզային այցեր են նախատեսված։
«Վնասի փոխհատուցման մասով նշեմ, որ բոլոր սցենարներն էլ նախարարությունում քննարկվում են»,- հավելեց նախարարի մամուլի քարտուղարը։
Մանյա Պողոսյան
