14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
41,6 մլն դրամանոց ավտոմեքենա՝ փոխվարչապետի համար․ Խաչատրյանը չգիտի՝ Փաշինյանի կրճատման ցուցակում իր մեքենան կա, թե՝ ոչ
Տնտեսություն
02.12.2024 | 17:42
Մի քանի ամիս առաջ փոխվարչապետ Տիգրան Խաչատրյանի համար 41,6 մլն դրամ արժեքով ծառայողական մեքենա է ձեռք բերվել։ Այն ներկայացուցչական դասի VOLVO S90 Plug in Hybrid մակնիշի ավտոմեքենա է՝ արտադրված 2024 թվականին։ Գործարքը տեղի է ունեցել 2024 թվականի հունիսի 27-ին։ Ի դեպ, կառավարությունը այս մոդելի երեք մեքենա է գնել՝ ընդհանուր վճարելով շուրջ 125 մլն դրամ։
Ավտոմեքենան ձեռք է բերվել «Ավանտգարդ» ՍՊԸ-ից՝ էլեկտրոնային աճուրդի միջոցով։ Factor.am-ն ավելի վաղ գրել էր, որ ՀՀ կառավարությունն այս ընկերությունից հունիսի ընթացքում 1 մլրդ 38 մլն դրամի այլ ավտոմեքենաներ է ձեռք բերել։ Այդ ժամանակ կառավարությունը չէր պարզաբանել, թե այս մեքենաներն ում են սպասարկելու։
Տիգրան Խաչատրյանի համար ծառայողական նոր մեքենա գնելու փաստը Factor.am-ը բացահայտել է Փաշինյանի հայտարարած կրճատումների գործընթացը ուսումնասիրելու ընթացքում։
Հիշեցնենք՝ նոյեմբերի 22-ին Հանրային ՀԸ-ին տված հարցազրույցի ժամանակ Նիկոլ Փաշինյանը հայտարարել էր, որ «կացնային ձևով կրճատելու է» ծառայողական մեքենաների թիվը։ Հարցին՝ քանի՞ տոկոսն է կացնով կտրելու, Փաշինյանը պատասխանել էր. «Շատ մեծ տոկոս, մոտավորապես 80, 90 տոկոսը»։
Factor.am-ը շուրջ երկու տասնյակի հասնող գերատեսչություններ գրավոր հարցումներ է ուղարկել՝ պարզելու համար, թե Փաշինյանի հայտարարությունից հետո կառույցներում քանի՞ մեքենա է կրճատվելու։ Եվ ահա, այս ուսումնասիրության ժամանակ պարզ է դառնում, որ փոխվարչապետ Տիգրան Խաչատրյանի համար նոր մեքենա է գնվել։
Փոխվարչապետի գրասենյակից փոխանցել են նաև, որ սա աշխատակազմում առկա միակ ծառայողական ավտոմեքենան է։ Ճշտող հարցին՝ արդյո՞ք այս մեքենան ընդգրկված է Փաշինյանի՝ կրճատվող մեքենաների ցանկում, պատասխանել են․ «Փոխվարչապետ Տիգրան Խաչատրյանի գրասենյակը նման տեղեկատվության չի տիրապետում»:
Նախորդ շաբաթ ՀՀ արդարադատության նախարարությունից Factor.am-ի գրավոր հարցին ի պատասխան տեղեկացրել էին, որ Փաշինյանի հայտարարությունից հետո գերատեսչությունում երեք ավտոմեքենա է կրճատվում, մնում է նախարարին սպասարկող Toyota Camry 2,5 մակնիշի ավտոմեքենան՝ 15 մլն դրամ արժեքով։
Նարեկ Կիրակոսյան
