Փաշինյանը երեք ավտոմեքենա է կրճատել Արդարադատության նախարարությունում

Նիկոլ Փաշինյանն արդարադատության նախարարությունում երեք ծառայողական ավտոմեքենա է կրճատել։ Այս մասին Factor.am-ի գրավոր հարցմանն ի պատասխան հայտնել են Սրբուհի Գալյանի ղեկավարած գերատեսչությունից։

Ըստ կառույցից ստացված պատասխանի կրճատվում են Hyundai Tucson, KIA Optima 2,4 և Wolkswagen Jetta մակնիշի ավտոմեքենաները, որոնց արժեքներն են համապատասխանաբար 9 մլն դրամ, 13 մլն դրամ և 8,5 մլն դրամ։ Նախարարությունից Factor.am-ին հայտնել են, որ այս ավտոմեքենաները մինչ այս նախատեսված են եղել անձնակազմի ընդհանուր օգտագործման համար։ Նախարարությունում այժմ մնում է մեկ ծառայողական ավտոմեքենա, որը սպասարկելու է նախարար Սրբուհի Գալյանին։ Այն 2015 թվականին արտադրված և նույն թվականին նախարարության կողմից ձեռք բերված Toyota Camry 2,5 մակնիշի ավտոմեքենա է՝ 15 մլն դրամ արժեքով։

Հիշեցնենք՝ ՀՀ վարչապետ Նիկոլ Փաշինյանն Ազգային ժողովում 2025 թվականի բյուջեի նախագծի քննարկումների ժամանակ նոյեմբերի 14-ին հայտարարել էր, թե կառավարության ավտոմեքենաների թիվը 20%-ով կրճատվել է։ Վարչապետը, սակայն, չէր նշել, թե որ տարվա ցուցանիշի հետ է համեմատությունը։ Factor.am-ն ուսումնասիրել էր Փաշինյանի պաշտոնավարման շրջանում ծառայողական մեքենաների թիվը և պարզել, որ 20 տոկոսի կրճատում երբևէ չի եղել։

Նիկոլ Փաշինյանն իր հայտարարությանը զուգահեռ մի տեսանյութ էր հրապարակել, որտեղ գրիչով նշումներ է անում թղթի վրա, նա կից գրել էր՝ կրճատում է ծառայողական մեքենաները, իսկ Հանրային ՀԸ-ին տված հարցազրույցում նշել էր, որ այս հարցով «կացնային» մոտեցում է դրսևորելու։

Factor.am-ը երկու տասնյակ գերատեսչությունների է հարցումներ ուղարկել՝ ծառայողական մեքենաների կրճատման վերաբերյալ տեղեկություններ ստանալու համար, որտեղից դեռ պատասխաններ չենք ստացել։

Նարեկ Կիրակոսյան