Փաշինյանի իշխանության օրոք «պադավատների» թիվն ավելացել է՝ ի հեճուկս Փաշինյանի պնդումների

ՀՀ վարչապետ Նիկոլ Փաշինյանն Ազգային ժողովում 2025 թ-ի բյուջեի նախագծի քննարկումների ժամանակ նոյեմբերի 14-ին հայտարարել է, թե կառավարության ավտոմեքենաների թիվը 20%-ով կրճատվել է։ Վարչապետը, սակայն, չի նշել, թե որ տարվա ցուցանիշի հետ է համեմատությունը։

Փորձենք մենք հաշվել։

2024 թ-ին վարչապետի աշխատակազմին սպասարկել է 40 ավտոմեքենա։ 2025 թ-ի բյուջեի նախագծում այդ թիվը չի փոփոխվել և կրկին 40 է։ Տարբերությունը՝ 0 %: Այսինքն՝ Ն․ Փաշինյանի նշած 20 % կրճատումն այս տարվան վերաբերելի չէ։

2018 թ-ի ծառայողական մեքենաների քանակը որոշել էր «նախկինների» կառավարությունը և հաստատել 2018-ի բյուջեի փաթեթով։ Փաշինյանի կաբինետն ընդունել է 2019 թ-ի բյուջեն և սահմանել այդ տարվա ծառայողական մեքենաների քանակը։ Ամեն դեպքում՝ թե՛ 2018 թ-ին, թե՛ 2019 թ-ին վարչապետի աշխատակազմին սպասարկել է 90 ավտոմեքենա։ Այս թվի համեմատ 2024-2025 թթ-ի ցուցանիշի տարբերությունը մոտ 55․5 % է։ Այսինքն՝ Ն․ Փաշինյանի նշած 20 %-ը սրան էլ վերաբերելի չէ։

Գուցե վարչապետը նկատի է ունեցել ամբո՞ղջ պետական ապարատին սպասարկող ավտոմեքենաները։

Factor.am-ն արդեն գրել է, որ 2024 թ-ի համեմատ պետական համակարգի ծառայողական մեքենաները 2025 թ-ին կպակասեն 22-ով` դառնալով 880։ Այս նվազումը մոտ 2․4% է։ Այսինքն՝ վարչապետի 20 %-ը սրան էլ վերաբերելի չէ։

2018 թ-ին պետական ապարատին սպասարկել է 902 ավտոմեքենա։ 2025 թ-ի նախատեսվածի համեմատ տարբերությունը ստացվում է մոտ 2.4 %։ Կրկին չի համապատասխանում Փաշինյանի հնչեցրած թվին՝ 20 %։

Հասկանալի չէ, թե ի՞նչ հաշվարկ է եղել վարչապետի հայտարարության հիմքում, թե «կառավարությունում 20 տոկոսն է կրճատվել»։

Օրերս իր հարցազրույցում Նիկոլ Փաշինյանն ասել է, թե այդ 20%-ը «բավարար չէ»։

«Ես գերատեսչությունների մեքենաների ցուցակներն ուզում եմ, առավոտյան էլ էի դրանով զբաղված, և ուղղակի այսպես՝ գրիչով խազեր եմ քաշում այդ մեքենաների վրա: Սա կացնային մոտեցում է, և ես համոզված եմ, որ այդ մոտեցման արդյունքում կառաջանան որոշակի կազմակերպչական խնդիրներ, բայց էլի այդ խնդիրները կառաջանան, որովհետև մեր գործընկերները ժամանակին պատշաճ ձևով չեն արձագանքել իմ հրապարակային և ոչ հրապարակային ասածներին: Հիմա ստիպված կացինով պետք է…»,- նշել է վարչապետը։

Մինչ Նիկոլ Փաշինյանը գործի կդնի «կացինը», մեծ ու փոքր պաշտոնյաները լիուլի շահագործում են ծառայողական մեքենաները։

Factor TV-ի «Պադավա՞տ, թե՞ պետություն․ Փաշինյանի օրոք փոխվել են միայն ծառայողական մեքենաների գները» փաստաքննության մեջ ներկայացրել էինք, որ իշխանափոխությունից հետո՝ 2019թ-ին, երբ արդեն Նիկոլ Փաշինյանի կառավարությունն էր լիիրավ պատասխանատուն, ավտոմեքենաների քանակը նախ հրապարակվել է 834, ապա տվյալների ճշգրտման արդյունքում այդ թիվը կտրուկ աճել է՝ դառնալով 1082 (ցուցակում ներառվել են այն մեքենաները, որոնց պահպանման ծախսերը 2019 թվականն էլ ներառյալ, կատարվում էին արտաբյուջետային միջոցների հաշվին)։ 2020-ին ծառայողական մեքենաների թիվը կրճատվել է 158-ով և դարձել 924, 2021-ին՝ 923։ 2022թ-ին դրանց քանակը կրկին ավելացել է՝ 10-ով՝ դառնալով 933: 2023 թվականին «դրական» դինամիկան շարունակվել է․ ծառայողական մեքենաներն ավելացել են 6-ով՝ դառնալով 939, 2024-ին գործադիրը ծառայողական մեքենաների թիվը «կրճատել» է միանգամից 37-ով՝ թողնելով 902-ը։ Եվ ահա 2025 թ-ին ծառայողական մեքենաների թիվը բյուջեի նախագծով նախատեսված է դարձնել 880, ինչն, ընդգծենք, 46-ով ավելին է, քան 2019 թ-ի ծառայողական մեքենաների թիվը։

Այսքան տարիների ընթացքում կարելի էր «կացինը» գործի դնել, «պադավատապետությունը» վերացնել ու վերջ տալ շահարկումներին։

Գայանե Խաչատրյան