Բրյուսելում նորից Մամեդյարովը կստանա բացասական պատասխան, և նորից լարվածություն կլինի սահմաններում. քաղաքագետ

«Չեմ կարծում, որ լուրջ արդյունք պետք է սպասել Հայաստանի և Ադրբեջանի արտաքին գործերի նախարարների բրյուսելյան հանդիպումից». այս մասին Factor.am-ի հետ զրույցում ասաց «Գլոբալիզացիայի և տարածաշրջանային համագործակցության» վերլուծական կենտրոնի խորհրդի նախագահ Ստեփան Գրիգորյանը՝ պարզաբանելով. «Պատճառներից գլխավորն այն է, որ Ադրբեջանը չի փոխում իր քաղաքականությունը․ իրենք գալիս ասում են, թե ե՞րբ եք հանձնելու տարածքները: Վերջին 3-4 տարիների ընթացքում դրսևորված դիվերսիաները, սահմանին զոհերը միտված են նրան, որ ՀՀ-ն միակողմանի զիջման գնա։ Բրյուսելում նորից Մամեդյարովը կստանա բացասական պատասխան, և նորից լարվածություն կլինի սահմաններում»։

Ստեփան Գրիգորյանի կարծիքով՝ ՀՀ արտաքին գերատեսչության ղեկավարը ստիպված է եղել գնալ հանդիպման, քանի որ միջազգային հանրությունը պահանջում է, որ բանակցությունները վերականգնվեն, սակայն ի սկզբանե պետք է իմանալ, որ հանդիպումն արդյունք չի ունենա։ Մեր դիտարկմանը, որ մայիսյան սրացումների ժամանակ ԵԱՀԿ ՄԽ համանախագահները հասցեական դատապարտող հայտարարությամբ հանդես եկան, ո՞րն է պատճառը, որ հուլիսի 4-ի սրացումների ժամանակ նման հասցեական հայտարարություն չեղավ, Ստեփան Գրիգորյանը պատասխանեց․ «Եթե հետևողականորեն դատապարտեն Ադրբեջանին, վերջինս դուրս կգա այդ պրոցեսից: ՄԽ-ն միջնորդ է, նա չի կարող որևէ մեկի կողմն անցնել, քանի որ դա կբերի նրան, որ մյուս կողմն ուղղակի դուրս կգա պրոցեսից»։

Ինչ վերաբերում է հանդիպման նախօրեին ՀՀ-ի ռազմավարական դաշնակից ՌԴ-ի կողմից Ադրբեջանին սպառազինության հերթական խմբաքանակը մատակարարելուն, քաղաքագետը նկատեց, որ դա ճնշում է ՀՀ-ի վրա, որպեսզի մեր արտաքին գործերի նախարարն ավելի հակված լինի զիջումների գնալ։

Առավել մանրամասն՝ տեսանյութում։

Սեդա Ղուկասյան