Իսկ դու ո՞րն ես նախընտրում․ ChatGPT, Copilot, Gemini, թե՞ Perplexity

Դե ինչ, գալու էր այս օրը, երբ մենք պիտի խոսեինք արհեստական բանականության արդեն տարբեր ծառայությունների մասին՝ փորձելով հասկանալ, թե որ դեպքում որ ծառայության հետ գործ ունենալ։

Արհեստական ​​ինտելեկտի արագ զարգացող աշխարհում մի քանի հիմնական խաղացողներ զգալի առաջընթաց են գրանցել օգտատերերի հետ փոխազդեցության և արտադրողականության բարձրացման ուղղությամբ: Այս հոդվածը ուսումնասիրում է չորս նշանավոր AI գործիքներ՝ ChatGPT (հիմնադիր՝ OpenAI), Copilot (հիմնադիրներ՝ Microsoft; GitHUB; OpenAI), Gemini (հիմանդիր՝ Google) և Perplexity (հիմնադիր՝ Perplexity AI)՝ մանրամասնելով դրանց հնարավորությունները, ուժեղ կողմերը և  առանձնահատկությունները:

Chat GPT (Չատ ՋիՓիԹի)

Generative Pre-trained Transformer (ChatGPT)-ն մշակվել է OpenAI ընկերության կողմից։ Այն դիտարկվում է որպես բարձր հարմարվողական AI մոդել։ GPT-ի վրա հիմնված այս հանրաճանաչ հավելվածն ահռելի աճ է գրանցել 2022 թվականի նոյեմբերին՝ իր գործարկումից անմիջապես հետո: Այն հինգ օրվա ընթացքում ունեցել է մեկ միլիոն օգտատեր, իսկ 2023 թվականի հունվարին՝ արդեն  100 միլիոն ակտիվ օգտատեր: 2024 թվականի մայիսի դրությամբ ChatGPT-ն ունի մոտ 180 միլիոն օգտատեր՝ ամսական 600 միլիոն այցելությամբ։ Այժմ այն գնահատվում է շուրջ 30 միլիարդ ԱՄՆ դոլար։

Պատկերացրեք, որ ունեք վիրտուալ օգնական, որը կարող է օգնել ձեզ գրել նամակներ, ստեղծել բլոգային գրառումներ, լուծել կոդավորման բարդ խնդիրներ, կատարել մաթեմատիկական հաշվարկներ, մշակել կրթական նյութեր, գեներացնել պատկերներ ու տեսանյութեր և կատարել  թարգմանություններ: Սա այն է, ինչ առաջարկում է ChatGPT-ն: Օրինակ, ChatGPT 4o-ն, որը հասանելի է բոլոր օգտատերերին, գերազանցում է իր նախորդ թողարկումները՝ համահունչ և համատեքստային լայն ու ընդգրկուն բովանդակություն  ստեղծելու հարցում։

GPT-ի ամենաուշագրավ առանձնահատկություններից մեկը երկար խոսակցությունների ընթացքում համատեքստը պահպանելու կարողությունն է, որը բովանդակալից պատասխաններ է տալիս նույնիսկ բազմակի փոխանակումից հետո: Այս հնարավորությունն այն դարձնում է ոչ միայն գործիք, այլ նաև զրուցակից: Ի դեպ, վերջերս ընկերությունը հայտարարեց Apple-ի հետ համագործակցության մասին, որի արդյունքում նախատեսվում է այն ինտեգրել Apple-ի արտադրանքներում՝ օգտատերերի հետ փոխազդեցությունը բարձրացնելով ևս մեկ մակարդակով։

GPT-4o-ի թոփ երեք ուժեղ կողմերը․

1. Այն կարող է հասկանալ ձայնը, պատկերը, տեքստը և պատասխանել՝ օգտագործելով նույն ձևաչափերը՝ ձայն, տեքստ և պատկեր:
2. Այն կարող է հասկանալ ձեր հնչերանգը/տրամադրությունը, արձագանքել համապատասխան էմոցիաներով և նույնիսկ մուտք գործել և մշակել ուղիղ տեսանյութերի տեղեկատվությունը: Սա թույլ է տալիս հենց գործիքի ներսից միացնել տեսախցիկը։ Ուղիղ կապի ամենատպավորիչ առանձնահատկությունն այն է, որ ցանկացած պահի կարող եք ընդհատել զրույցը: Պետք չէ սպասել, որ այն ավարտի խոսակցությունը:
3. OpenAI-ը GPT-4o-ն հասանելի է դարձրել բոլորի համար։ Եթե GPT4-ը հասանելի էր միայն վճարովի եղանակով, ապա այս թարմացված և ավելի հզոր տարբերակը նախատեսված է բոլորի համար։ Միակ սահմանափակումը հարցումների քանակն է։

Copilot (Քոփայլթ)

Copilot-ը GitHub-ի և OpenAI-ի համատեղ ձեռնարկությունն է, որը հիմնադրվել է 2021 թվականին՝ Microsoft ընկերության նախաձեռնությամբ։ 2023-ի հոկտեմբերի դրությամբ այն ունի ավելի քան 1 միլիոն օգտատեր՝ 37,000 կազմակերպություներից, որոնք կորպորատիվ եղանակով օգտագործում են այս գործիքը։

Պատկերացրեք, որ դուք ծրագրավորող եք, որը ծանրաբեռնված է բարդ կոդերով աշխատանքով: Լուծումներ փնտրելու համար ժամեր ծախսելու փոխարեն, դուք պարզապես սկսում եք մուտքագրել դրանք, և Copilot-ն առաջարկում է համապատասխան կոդի հատվածներ և նույնիսկ ամբողջական ալգորիթմներ: Ինտեգրված զարգացման այնպիսի հայտնի միջավայրերում, ինչպիսին է Visual Studio Code-ը, Copilot-ը բարձրացնում է արտադրողականությունը՝ ավտոմատացնելով սովորական կոդավորման առաջադրանքները և տրամադրելով խելացի առաջարկներ՝ հիմնված ձեր նախագծի համատեքստի վրա:

Չսահմանափակվելով միայն կոդով, Microsoft-ի կողմից Copilot-ի ընդլայնումն իրենց կողմից մշակված Microsoft Office փաթեթի մեջ, հնարավորություն է տալիս, որպեսզի դուք կիրառեք արհեստական ​​բանականությունը փաստաթղթերի նախագծման (Word, Excel), տվյալների վերլուծության և կրկնվող առաջադրանքների ավտոմատացման գործում: Այն թույլ է տալիս անգամ համակցված աշխատանք Outlook էլեկտրոնային փոստի, OneDrive ամպային տիրույթի հետ, կարող է որոնումներ անել փաստաթղթերի բազաներում, դրանց բովանդակության մեջ, հիշեցնել ձեզ պարտավորությունների և վերջնաժամկետների մասին և այլն։ Այս ինտեգրումը ցույց է տալիս, թե ինչպես է AI-ը կարողանում անխափան կերպով տեղավորվել առօրյա աշխատանքային հոսքերի մեջ՝ դարձնելով առաջադրանքների կատարումն ավելի հեշտ և արդյունավետ: Վերջին թարմացումների արդյունքում այն ավտոմատ հասանելի է նաև Windows օպերացիոն համակարգով աշխատող համակարգիչներում։ Այս տարբերակը շատ ավելի գրավիչ կլինի գրասենյակային աշխատողների համար։

Copilot-ի թոփ երեք ուժեղ կողմերը․

1. Այն օգտագործում է AI ալգորիթմներ՝ Microsoft 365 հավելվածներում տվյալները վերլուծելու համար և կարող է օգնել Excel-ում բարդ առաջադրանքների կատարմանը՝ սկսած բանաձևերի մշակումից մինչև գծապատկերների ստեղծում:
2. Copilot-ը կարող է ավտոմատ կերպով տառադարձել/սղագրել առցանց հանդիպումներն իրական ժամանակում՝ նշելով այդ պահի խոսնակի ինքնությունը՝ ներառելով խոսողի անունը ասվածի կողքին, պայմանով, որ մասնակիցները նախապես ձայնագրել են իրենց ձայնը Copilot-ի համար, և այն ըստ ձայնի տարբերակում է նրանց:
3. Այն կարող է ստեղծել փաստաթղթերի նախագծեր և էլ. նամակներ՝ հիմնված օգտատերերի հուշումների վրա՝ օգնելով աշխատողներին արդյունավետորեն կառավարել իրենց մուտքի արկղերը և թվային գործառույթները: Այն նաև թույլ է տալիս իրականացնել բազմաթիվ հարցումներ՝ բացառելով որոնողական համակարգերում երկար փնտրտուքները և արագորեն ստանալ տեղեկատվությունն ու դրան առնչվող աղբյուրների հղումները։

Gemini (Ջեմինի)

Gemini-ն, որը նախկինում հայտնի էր որպես Bard (հիմնադրվել է 2023-ին, վերանվանվել՝ 2024-ին), Google-ի առաջատար AI-ն է, որը մշակվել է ի պատասխան  ChatGPT-ի հաջողության: 2024-ի մայիսի դրությամբ Google Gemini-ն գրանցել է 313,9 միլիոն այցելություն, որոնցից 143,1 միլիոնը եղել են համակարգիչներից, 170,8 միլիոնը՝ սմարթֆոններից:

Օգտագործելով առաջադեմ լեզվական մոդելներ, ինչպիսիք են PaLM 2-ը և Gemini Pro-ն, այս AI-ը նպատակ ունի կիրառել առավել նուրբ և պրոֆեսիոնալ բառամթերք, որոնք երբեմն կարող են գերազանցել անգամ ոլորտի մասնագետներին։ Gemini-ն անվճար հասանելի է բոլորին, ովքեր ունեն Google հաշիվ: Պատկերացրեք, որ ունեք AI, որը ոչ միայն պատասխանում է ձեր հարցերին, այլև դա անում է գրավիչ և հաճախ զարմանալիորեն խորաթափանց կերպով:

Ի դեպ, քանի որ այն Google-ի արտադրանքների դասին է պատկանում, կարող է ինտեգրվել նաև Gmail էլեկտրոնային փոստի և Google Drive ամպային ծառայություններին։ Սա շատ օգտակար գործիք է, որը թույլ է տալիս աշխատել էլեկտրոնային նամակների, պլանավորման աշխատանքների, օրացույցերի, ամպային տիրույթում պահպանվող տվյալների հետ՝ դյուրացնելով օգտատիրոջ փոխազդեցությունը Google-ի արտադրանքների հետ։

Gemini-ի թոփ երեք ուժեղ կողմերը.

1. Այն ունի բնական զրույցներում ներգրավվելու մեծ ունակություն՝ ներառելով և՛ տեքստը, և՛ վիզուալները հաղորդակցության մեջ, որը նոր ուղիներ է բացում մարդ-մեքենա փոխազդեցության գործընթացում: Այն կարող է անցկացնել իմաստալից երկխոսություններ, հարմարվել խոսակցության տարբեր ոճերին և տրամադրել անհատականացված պատասխաններ՝ հիմնված համատեքստի վրա:
2. Այն կարող թարգմանել տեքստերն ուշագրավ ճշգրտությամբ, որը խթանում է անխափան գլոբալ հաղորդակցությանը՝ վերացնելով լեզվական խոչընդոտները: Այն կարող է նաև հասկանալ մարդկային լեզուն նրբերանգներով՝ վերծանելով բարդ հասկացությունները և իմաստալից պատկերացումներ քաղելով հսկայական քանակությամբ տեքստային տվյալներից:
3. Այն օգնում է տեսողության խնդիր ունեցող մարդկանց՝ էկրանը համապատասխանեցնելով օգտատիրոջ ֆիզիկական կարողություններին, իսկ հարցումները հնարավոր է իրականացնել ոչ միայն տեքստային, այլև պատկերի և ուղիղ տեսանյութի միջոցով փոխանցվող տեղեկություններով՝ ապահովելով համաժամանակյա արձագանք։

Perplexity AI (Փերփլեքսիթի ԷյԱյ)

Perplexity-ն գործարկվել է 2023 թվականին՝ համանուն ընկերության կողմից։ Վերջին տվյալների համաձայն, Perplexity AI-ն ունի ամսական մոտավորապես 10 միլիոն ակտիվ օգտատեր։ Իսկ 2023 թվականի ընթացքում AI ստարտափը սպասարկել է ավելի քան 500 միլիոն որոնման հարցում։ Ներկայումս Perplexity-ն ամսական ունենում է ավելի քան 50 միլիոն այցելություն։

Perplexity-ն միաձուլում է խոսակցական գործակալի հնարավորությունները որոնման համակարգի ճշգրտության հետ: Պատկերացրեք, որ որոնման համակարգին հարց եք տալիս և հղումների ցուցակի փոխարեն ստանում եք հակիրճ, հստակ ձևակերպված պատասխան: Perplexity-ն հասնում է դրան՝ համատեղելով AI-ն իրական ժամանակի որոնման հնարավորությունների հետ՝ ապահովելով ավելի ինտերակտիվ և արձագանքող որոնման փորձ: Այն շատ կիրառելի է տեքստային բովանդակության հետ գործ ունեցողների, և, մասնավորապես, հետազոտողների համար։

Այս հիբրիդային մոտեցումը նշանակում է, որ դուք կարող եք ունենալ խոսակցական հարցման փորձ, որտեղ հետագա հարցերը ըմբռնվում և պատասխան են ստանում ընդհանուր համատեքստում, ինչպես դա կաներ մարդը: Սա Perplexity-ն հատկապես օգտակար է դարձնում տեղեկատվության արագ որոնման համար, թեև այն միշտ չէ, որ կարող է ապահովել ավելի բարդ հարցումների համար պատասխանների անհրաժեշտ խորությունը:

Perplexity-ի թոփ երեք ուժեղ կողմերը.

1. Այն ձեզ տալիս է ինտերակտիվ որոնման փորձ, ինչպես հանրային գրադարանում կաներ գրադարանավարը: Դուք գրադարանավարին ասում եք, որ փնտրում եք որոշակի տեղեկատվություն: Գրադարանավարը համագործակցում է ձեզ հետ և հարցեր է տալիս՝ հասկանալու, թե կոնկրետ ինչ եք փնտրում, որպեսզի օգնի ձեզ գտնել համապատասխան գրքեր կամ հետազոտական ​​փաստաթղթեր, այլ ոչ թե պարզապես ձեզ ցուցակ տրամադրել: Նույնը անում է այս գործիքը։
2. Այն կարող է իրական ժամանակում որոնումներ կատարել առցանց՝ ըստ պահանջի տեղեկատվություն տրամադրելու համար: Գործիքը որոնումներն իրականացնում է կայքերում, ֆորումներում, անգամ սոցիալական մեդիայի հարթակներում։ Այն պարբերաբար սկանավորում է այս առցանց աղբյուրները՝ թարմացված և ճշգրիտ արդյունքներ գտնելու համար:
3. Քանի որ AI որոնման համակարգերը համեմատաբար նոր են, դուք պետք է համոզվեք, որ ձեր տեղեկատվությունը վստահելի է: Perplexity-ն մեջբերում է բոլոր աղբյուրները, որոնցից հավաքել է տեղեկատվությունը ձեր որոնման հարցման համար: Սա հիանալի հնարավորություն է նրանց համար, ովքեր օգտագործում են գործիքը հետազոտության և որոշումներ կայացնելու համար:

Ամփոփվելով՝ պետք է ասենք, որ AI գործիքները՝ GPT-ն, Copilot-ը, Gemini-ն և Perplexity-ն, յուրաքանչյուրը յուրօրինակ առաջարկ է ներկայացնում օգտատերերին՝ բավարարելով վերջիններիս բազմազան կարիքները և բարձրացնելով արտադրողականությունը տարբեր ձևերով: Չնայած իրենց ուժեղ կողմերին, դրանք զերծ չեն թերություններից: Ինչպես շատ AI մոդելներ, դրանք երբեմն կարող են սխալ կամ անհեթեթ պատասխաններ տալ․ մի երևույթ, որը հայտնի է որպես «հալյուցինացիա» կամ «զգայապատրանք» AI համայնքում։

Հասկանալով այս գործիքների հնարավորություններն ու սահմանափակումները՝ դուք կարող եք ընտրել AI-ի լավագույն լուծումը ձեր հատուկ կարիքների համար, որը կօգնի դյուրացնել ձեր աշխատանքը թվային միջավայրում։

Ալեքսանդր Մարտիրոսյան