Երաշտի ֆոնին` Իրանը ցանկանում է ջուր գնել հարևան երկրներից

Իրանի կառավարությունը ծրագրում է ջուր գնել հարևան երկրներից՝ դիմակայելու համազգային երաշտին, գրում է DPA գործակալությունը։

«Եթե որևէ երկիր պատրաստ է ջուր վաճառել, մենք կգնենք այն»,- «Ֆարս» գործակալության հաղորդմամբ՝ ասել է երկրի էներգետիկայի նախարար Աբբաս Ալիաբադին։

Ըստ հրապարակման՝ Իրանի հարևանների մեծ մասը, այդ թվում՝ Իրաքը, Աֆղանստանը և Պակիստանի սահմանային շրջանները, նույնպես տառապում են երաշտից և ջրի պակասից։ Մյուս կողմից, հյուսիսում գտնվող Հայաստանը համեմատաբար ավելի մեծ ջրային պաշարներ ունի։

Իրանն աշխարհի ամենաչոր երկրներից մեկն է։ Վերջին տարիներին մասնագետները նկատել են տեղումների զգալի նվազում, մինչդեռ երաշտներն ու այլ ծայրահեղ եղանակային երևույթներն աճում են։ Մասնագետները տարիներ շարունակ զգուշացնում են, որ Իրանի գյուղատնտեսությունը տառապում է անբարենպաստ խթաններից։

Իրանը վեցերորդ տարին անընդմեջ երաշտի մեջ է, նշում է ՄԱԿ-ի փորձագետ Քավեհ Մադանին Forbes բիզնես ամսագրում։ Նա կարծում է, որ կլիմայի փոփոխությունը մասամբ մեղավոր է, բայց տարիների անարդյունավետ կառավարումը նույնպես էական գործոն է։

«Այն, ինչ մենք այսօր զգում ենք, այլևս ջրային ճգնաժամ չէ, այլ «ջրային անվճարունակություն»՝ համակարգի ձախողում, որը երկար ժամանակահատվածում ավելի շատ ջուր է արդյունահանել, քան բնությունը կարող էր վերականգնել»,- գրել է նա հոդվածում։

Մադանին կոչ է արել վերանայել և արմատական ​​խնայողություններ կատարել գյուղատնտեսության մեջ, որը կազմում է Իրանի ջրի սպառման շուրջ 90%-ը։

Թարգմանությունը՝ Էմմա Չոբանյանի