11.09.2026 | 15:51
Սամվել Կարապետյանի գործով դատական նիստը. ՈՒՂԻՂ
Հնդկաստանը 2 միլիարդ դոլարով վարձակալության կվերցնի ռուսական միջուկային սուզանավը. Bloomberg
Քաղաքականություն
04.12.2025 | 23:18
Հնդկաստանը Ռուսաստանից կվարձակալի միջուկային հարվածային սուզանավ, հաղորդում է Bloomberg-ը՝ հղում անելով իր աղբյուրներին:Meduza-ի փոխանցմամբ՝ Հնդկաստանի ռազմածովային ուժերը սուզանավը կվարձակալեն 10 տարով: Գործարքի արժեքը կազմում է 2 միլիարդ դոլար։
Աղբյուրները հիշեցրել են, որ Հնդկաստանի ռազմածովային ուժերին ռուսական սուզանավը վարձակալությամբ տրամադրելու հարցը քննարկվել է մի քանի տարի, սակայն կողմերը չեն կարողացել համաձայնության գալ գնի շուրջ: Այժմ, նրանք հայտնել են, որ գործարքը համաձայնեցված է, և հնդիկ նավաստիները նոյեմբերին արդեն այցելել են ռուսական նավաշինարան։
Հնդկաստանը, ենթադրաբար, սուզանավը կստանա երկու տարվա ընթացքում, սակայն մատակարարման ամսաթիվը կարող է հետաձգվել նախագծի բարդության պատճառով։
Bloomberg-ի փոխանցմամբ՝ վարձակալության պայմանների համաձայն՝ ռուսական սուզանավը չի կարող կիրառվել ռազմական գործողություններում և կարող է օգտագործվել միայն զորավարժությունների ժամանակ։ Աղբյուրների համաձայն՝ Հնդկաստանը նախատեսում է օգտագործել ռուսական սուզանավն իր նավաստիներին մարզելու համար, մինչ կառուցում է իր սեփական երկու միջուկային սուզանավերը։
Ռուսական սուզանավի վարձակալության պայմանագրի մասին հայտարարվում է Ռուսաստանի նախագահ Վլադիմիր Պուտինի Հնդկաստան այցից առաջ, որն առաջինն է Ուկրաինա լայնածավալ ներխուժումից հետո։
Վերջին անգամ Հնդկաստանը ռուսական սուզանավ վարձակալել էր 2012 թվականին, երբ Հնդկաստանի ռազմածովային ուժերը ստացել էին «Ներպա» դասի սուզանավը։ Այն ուշացել էր, մասամբ՝ 2008 թվականի նոյեմբերին «Ներպա»-ի պետական ընդունման գործընթացի ժամանակ հրդեհաշիջման համակարգի խափանման պատճառով, որի հետևանքով զոհվել էր 20, վիրավորվել՝ 21 մարդ։ Սուզանավը պետք է վարձակալվեր Հնդկաստանի ռազմածովային ուժերի կողմից 10 տարով, սակայն 2021 թվականի հունիսին ժամկետից շուտ վերադարձվել էր Ռուսաստանին։
Թարգմանությունը՝ Էմմա Չոբանյանի
