Որքանո՞վ է անվտանգ սոցցանցերում խորհրդատվության միջոցով երեխաների բուժումը. ՏԵՍԱՆՅՈՒԹ

Մեր օրերում  ծնողները  երեխային բուժելու համար հաճախ դիմում են ոչ թե բժշկի, այլ ՝սոցցանցերի օգնությանը: Փոխօգնության խմբերում կարելի է հանդիպել բազմաթիվ գրառումների, որտեղ մայրիկն անհասկանալի կերպով  օգնության է կանչում բոլորին՝ իր երեխային բուժելու խորհրդատվության համար:

Ճի՞շտ է արդյոք նման եղանակով երեխային բուժել, և ի՞նչ հետևանքներ կարող է ունենալ այս ամենը:

Մանկաբույժ Նոնա Եղոյանի համոզմամբ՝ իրավիճակն ավելի անկառավարելի էր դեռ 2-3 տարի առաջ, երբ նմանատիպ խմբերում վերահսկողություն առհասարակ չկար: Հիմա որոշ խմբերում գրանցված են նաև բժիշկներ, և քիչ թե շատ  գրառումները վերահսկվում  են:

«Գոյություն ունի սահման, շատ հաճախ գրում են այնպիսի հարցեր, օրինակ՝ երեխան ցանավորվել է, երեխան ցնցվում է, երեխան ինչ- որ բան է կուլ տվել, ու փորձում են սոցցանցերի միջոցով բուժումներ անել, կատեգորիկ դեմ եմ: Այդ դեպքում չարաշահվում է սոցցանցի միջոցով բուժումը, չեմ կարող ասել ծնողները խուճապի են մատնվում, թե պարզապես ժամանակ չունեն, թե ալարում են  երեխային տանեն հիվանդանոց, բայց այս դեպքում դեմ եմ, որ ծնողները բուժեն նման ձևով»,- նշում է Նոնա Եղոյանը։

Նրա խոսքով՝ ծնողները շատ հաճախ  սոցցանցերի և համացանցի միջոցով փորձում են փնտրել այնպիսի հիվանդությունների պատասխաններ, որոնք բավականին լուրջ բուժում են պարունակում, և բժշկի միջամտության կարիք ունեն:

ԱՆ աշխատակազմի մոր և մանկան  առողջության պահպանման վարչության պետ Կարինե Սարիբեկյանի գնահատմամբ՝ մայրերի փոխօգնության խմբերի գաղափարն ինքնին լավն է, բայց չպետք է անցնել մասնագիտական խորհրդատվության սահմանները:

«Իհարկե, կան վտանգներ, մայրերը կարող են հենվել կամ սեփական փորձի վրա, կամ հարևանի, ոչ միշտ ճիշտ խորհրդատվություն կամ բուժման մեթոդներ կարող են առաջարկել։ Եթե այդ խմբերում կան բժիշկներ, դեռ ոչինչ, բայց մեծ իմաստով բուժման հարցերը չի կարելի անել խորհուրդների միջոցով, և հատկապես ծնողների»,- նշում է Կարինե Սարիբեկյանը։

Նա հիշեցնում է, որ մինչև 17 տարեկան երեխաների  պոլիկլինիկական բուժօգնությունն անվճար է, և բժշկի հետ շփման համար մատչելիության համակարգը պահպանված է: Բժշկին չվստահելու պատճառաբանությունը,  ըստ նրա, արդարացում չէ, և սոցցանցը երբեք չի կարող ավելի անվտանգ լինել:

Մանրամասները՝ տեսանյութում։

Անի Մնացականյան