Երասխից՝ Զոդ․ ինչու է սև մետաղի ջարդոնի վերամշակման գործարանը կառուցվում նոր վայրում

«Ջի Թի Բի Սթիլ» ընկերությունը սև մետաղի ջարդոնի վերամշակման գործարանը Երասխից տեղափոխել է նույն՝ Արարատ համայնքի Զոդ բանավանի մերձակա տարածք։ Դեկտեմբերի 19-ին ընկերությունը Շրջակա միջավայրի նախարարություն է ներկայացրել ՀՀ Արարատի մարզի Արարատ համայնքում սև մետաղի ջարդոնի վերամշակման գործարանի նախնական գնահատման հաշվետվությունը։
Փաստաթղթում հատուկ նշված է, որ գործարանի համար ընտրված տեղամասը գտնվում է ՀՀ պետական սահմանից (հեղ․՝ Թուրքիայի հետ) 5 կմ, իսկ Ադրբեջանի հետ սահամանից՝ 12․13 կմ հեռավորության վրա։ Երասխում, հիշեցնենք, կառուցվող գործարանից հակառակորդի դիրքերն ընդամենը 400 մետր հեռավորության վրա էին։

Երասխում 1.5 հա տարածքի փոխարեն, նոր վայրում գործարանին հատկացվել է 8.91 հա, որն, ըստ հաշվետվության, իրենից ներկայացնում է ծայրահեղ աղակալված, ուժեղ հիմնային հողեր՝ գյուղատնտեսության համար ոչ պիտանի։

Նախագծի մնացած տվյալները գրեթե նույնն են՝ դրա իրականացման արդյունքում նախատեսվում է ստեղծել 250 աշխատատեղ՝ 250 000 – 270 000դրամ աշխատավարձով։ Գործարանում ձուլման ընթացքում ավելացվող նյութերի արդյունքում ստացվելու են պահանջվող որակի պողպատի մակնիշներ՝ Fe-415, Fe-500, Fe-550։ Տարեկան արտադրողականությունը նախատեսվում է 108 000 տոնա սև մետաղի ջարդոնի վերամշակում։

Հիշեցնենք, որ Երասխում գործարանի կառուցման աշխատանքները մեկնարկել էին մոտ 8 ամիս առաջ։ Ադրբեջանի բնապահպանության նախարարությունը հայտարարել էր, թե այդ նախագիծը հարվածում է տարածաշրջանի բնապահպանական անվտանգությանը և կարող է աղտոտել Արաքսի ջրերը։ Դրանից հետո Ադրբեջանը սկսել էր կրակել կառուցվող գործարանի ուղղությամբ, ինչի հետևանքով վիրավորվել էր գործարանի շինարարական աշխատանքներում ներգրավված Հնդկաստանի երկու քաղաքացի: Իրավիճակը չփոխեց նաև տարածքում ԱՄՆ դրոշ բարձրացնելը։ 

Գայանե  Խաչատրյան