21.12.2025 | 11:11
«Ինտերը», «Յուվենտուսը» և «Նապոլին» հետևում են Սպերցյանի խաղին․ գործակալ
ՄԱԿ-ի առաքելությունը ԼՂ-ում հիվանդանոցներին, դպրոցներին հասցված որևէ վնաս չի տեսել, բայց «ապշած է այն հանկարծակիությունից, որով տեղի բնակչությունը լքել է իրենց տները»
02.10.2023 | 22:58
Միավորված ազգերի կազմակերպության խումբը, որն այցելել է Լեռնային Ղարաբաղ, քաղաքացիական ենթակառուցվածքներին, ինչպիսիք են հիվանդանոցները, դպրոցները, բնակելի տները կամ մշակութային և կրոնական օբյեկտները, հասցված որևէ վնաս չի տեսել, երկուշաբթի հայտարարել է ՄԱԿ-ի պաշտոնական ներկայացուցիչ Ստեֆան Դյուժարիկը, գրում է Reuters-ը։
«Այցը տեղի է ունեցել մի քանի շաբաթ անց այն բանից հետո, երբ ադրբեջանական զորքերը վերահսկողության տակ են վերցրել էթնիկ հայերով բնակեցված իրենց տարածքում գտնվող անկլավը՝ առաջացնելով ավելի քան 100 000 հայերի զանգվածային արտագաղթ: Մեր գործընկերներին ապշեցրել է այն հանկարծակիությունը, որով տեղի բնակչությունը լքել է իրենց տները և այն տառապանքը, որը, հավանաբար, պատճառել է նրանց այդ փորձությունը», – լրագրողներին ասել է Դյուժարիկը:
«Նրանք վերջին հրադադարից հետո քաղաքացիական անձանց նկատմամբ բռնության մասին ոչ մի հաղորդագրության չեն հանդիպել ո՛չ տեղի բնակչությունից, ո՛չ էլ այլ անձանցից»,– հայտարարել է նա:
Ըստ նրա՝ ՄԱԿ-ի թիմի անդամները չեն տեսել գյուղատնտեսական ենթակառուցվածքներին հասցված վնաս կամ սատկած կենդանիներ:
Գործակալությունն արձանագրում է, որ Հայաստանը Ադրբեջանին մեղադրում է էթնիկ զտումների մեջ՝ մեղադրանք, որը Բաքուն հերքում է։ Ադրբեջանն իր հերթին պնդում է, թե «անկլավի հայերին թույլատրվել է մնալ տարածքում, նաև վստահեցնում, թե մտադիր չէ հարձակվել Հայաստանի վրա»։
Հայաստանը կոչ է արել Եվրամիությանը պատժամիջոցներ սահմանել Ադրբեջանի դեմ Լեռնային Ղարաբաղում ռազմական գործողության համար և նախազգուշացրել, որ Բաքուն կարող է շուտով նաև հարձակվել Հայաստանի վրա, եթե Արևմուտքը վճռական գործողություններ չձեռնարկի:
«ՄԱԿ-ի առաքելությունը նպատակ ուներ գնահատել իրավիճակը տեղում և բացահայտել մարդասիրական կարիքները ինչպես մնացած մարդկանց, այնպես էլ նրանց, ովքեր տեղափոխվում են», ասել է Դյուժարիկը ՝ հավելելով, որ համայնքի ներկայացուցիչները ՄԱԿ-ի պաշտոնյաներին հայտնել են, որ ներկայումս Ղարաբաղում մնում է 50-1000 էթնիկ հայ»:
Դյուժարիկը նշել է, որ քաղաքում, ըստ երևույթին, ոչ մի խանութ չի բացվել, և որ Ադրբեջանը պատրաստվում է վերսկսել բժշկական օգնության և քաղաքի հիմնական կոմունալ ծառայությունների կազմակերպումը:
«Թիմը շեշտում է վստահության վերականգնման անհրաժեշտությունը՝ հավելելով, որ դա բոլոր կողմերից ժամանակ և ջանք կպահանջի։ ՄԱԿ-ը նախատեսում է շարունակել պարբերաբար այցելել տարածաշրջան», – ասել է Դյուժարիկը:
