Ուկրաինայում Կոլոմոյսկուն արդեն երրորդ մեղադրանք է առաջադրվել

Ուկրաինացի գործարար Իգոր Կոլոմոյսկուն արդեն երրորդ մեղադրանքն է առաջադրվել։ Նա մեղադրվում է 5,8 միլիարդ գրիվնա «հափշտակելու» մեջ, ասվում է Ուկրաինայի Անվտանգության ծառայության՝ սեպտեմբերի 15-ին հրապարակված հաղորդագրության մեջ։

Զեկույցում ասվում է, որ Կոլոմոյսկին, ըստ քննիչների, 2013-ից 2014 թվականներին իրեն պատկանող «Պրիվատբանկի»
աշխատակիցների մասնակցությամբ ստեղծել է հանցավոր խումբ, որի միջոցով կեղծ կանխիկ ավանդներ են համակարգված կերպով մուտքագրվել բանկի դրամարկղ, թեև իրականում միջոցներ չեն ստացել:

Այս սխեման, ըստ Ուկրաինայի Անվտանգության ծառայության, թույլ է տվել Կոլոմոյսկուն իր հաշիվներին ստանալ 5,8 միլիարդ անկանխիկ գրիվնա (այդ ժամանակաշրջանի փոխարժեքով՝ շուրջ 700 միլիոն դոլար): Կոլոմոյսկին, ըստ քննիչների, հաշիվներում եղած միջոցներն օգտագործել է վարկեր տրամադրելու, իր վերահսկողության տակ գտնվող ձեռնարկություններից վարկերը մարելու համար, ինչպես նաև դրանք փոխանցել է արտերկիր, կանխիկացրել և բանկերի մասնաճյուղերից հանել:

Սեպտեմբերի սկզբին Ուկրաինայի դատարանը ձերբակալել էր Կոլոմոյսկուն՝ 509 մլն գրիվնայի չափով գրավի դիմաց ազատվելու հնարավորությամբ։ Այնուհետ Անվտանգության ծառայությունը հայտնել է, որ գործարարը կասկածվում է խարդախության և հանցավոր ճանապարհով ձեռք բերված գույքի օրինականացման մեջ։ Ըստ քննիչների՝ 2013-ից 2020 թվականներին Կոլոմոյսկին վերահսկվող բանկային կառույցների միջոցով արտասահման է փոխանցել ավելի քան կես միլիարդ գրիվնա (14 միլիոն դոլար):

Ձերբակալությունից մի քանի օր անց Կոլոմոյսկիին երկրորդ մեղադրանքն է առաջադրվել՝ «Պրիվատբանկի» միջոցներից 9,2 միլիարդ գրիվնա գումար «վերցնելու» համար։