11.01.2025 | 13:00
Հրդեհ Նոյեմբերյան քաղաքում․ այրվել է խանութի 3 տաղավար
Երեխաներին պետք է դեպի դասական արվեստը բերել մանկուց. դպրոցը շատ անելիք ունի. Մագդա Մկրտչյան. ՏԵՍԱՆՅՈՒԹ
Հասարակություն
11.02.2023 | 19:00
«Օպերան թանկ, էլիտար և ներդրումներ պահանջող արվեստ է, պետությունը, խոշոր ընկերությունները պետք է ամեն կերպ հովանավորեն օպերային արվեստը: Չէ՞ որ աշխարհի առաջատար օպերային թատրոններն ունեն իրենց մշտական հովանավորները, օրինակ` Սիդնեյի օպերային թատրոնը հովանավորում է «Սամսունգը»: Օպերային արվեստը հովանավորելով` գործարարի ստատուսն էլ է բարձրանում: Զարմանալի է, որ գործարարները կարող են ոչ մնայուն ֆիլմեր հովանավորել, իսկ օպերային արվեստը` ոչ: Առանց հզոր հովանավորի չի կարող լինել հզոր օպերային թատրոն»,- Factor TV-ի հետ զրույցում նման տեսակետ է հայտնում օպերային երգչուհի, ՀՀ վաստակավոր արտիստ Մագդա Մկրտչյանը:
Նա ափսոսում է, որ Ալ. Սպենդիարյանի անվան օպերայի և բալետի ազգային ակադեմիական թատրոնում կան կարող ուժեր, լավ գաղափարներ, սակայն նոր ներկայացումները քիչ են. «Ցավալի է, որ տարիներն անցնում են, իսկ օպերային թատրոնում պրեմիերաներ քիչ են լինում: Արտիստները կորցնում են իրենց լավագույն տարիները: Մենք ունենք արտիստական լուրջ կազմ, եթե միջոցներ լինեին, կունենայինք հարուստ խաղացանկ: Ֆինանսավորման հարցը պետք է լուրջ դրվի: Եթե ներկայացումները շատանան, ցածր աշխատավարձերի խնդիրն էլ կլուծվի»:
Օպերային երգչուհու կարծիքով` դասական արվեստի նկատմամբ սերը փոքրուց պետք է սերմանվի հանրության շրջանում. «Մենք օպերային թատրոնում փորձում ենք մանկական ներկայացումներ բեմադրել, նպատակ ունենք երեխաներին բերելու դեպի դասական արվեստը: Նման աշխատանքներ պետք է տանել հանրակրթական դպրոցներից սկսած»:
Մագդա Մկրտչյանը խոսում է նաև մեր երկրի համար դժվարին այս ժամանակներում արտիստի կյանքի, աշխատանքին դժվարությամբ ինտեգրվելու մասին.
«Շատ դժվար է ողնաշարն ուղղել և բարձրանալ բեմ: Ասեմ, որ Լենինգրադի բլոկադայի ժամանակ հենց արվեստով են պահել մարդկանց: Որպես արտիստ` ներսում դատարկություն եմ զգում, վաղվա օրն անորոշ է, բայց ես լավատես եմ»:
Մանրամասները` տեսանյութում:
Աննա Բաբաջանյան
