Բուհերը Երևանից արհեստականորեն Աշտարակ տեղափոխելն աբսուրդի ժանրի մտադրություն է. Ատոմ Մխիթարյան․ ՏԵՍԱՆՅՈՒԹ

«Աշտարակում դեռևս խորհրդային տարիներից գոյություն ունեն գիտահետազոտական ինստիտուտներ, որոնց հիմքի վրա կարելի է տեխնոլոգիական հետազոտական համալսարան հիմնել: Բայց բուհերը Երևանից արհեստականորեն Աշտարակ տեղափոխելն աբսուրդի ժանրի մտադրություն է»,- Factor TV-ի հետ զրույցում նման տեսակետ է հայտնում կրթության փորձագետ Ատոմ Մխիթարյանը` անդրադառնալով վարչապետ Նիկոլ Փաշինյանի այն հայտարարությանը, որ կառավարությունը բուհերում մեծ թվով թափուր տեղերով պայմանավորված մտադիր է գնալ բուհերի խոշորացման` թողնելով 8 կոնսոլիդացված պետական բուհ և Աշտարակում հիմնել ակադեմիական քաղաք:

Փորձագետի խոսքով` եթե այս մտադրությունն իրականացվի, թե´ դասախոսները, թե´ ուսանողները կանգնելու են լուրջ խնդիրների առջև.

«Դասախոսներն այնքան չեն վարձատրվում, որ ամեն օր գնան Աշտարակ և հետ գան, նրանք պատրաստ են հրաժարվել իրենց աշխատանքից, միայն թե չգնան Աշտարակ: Իսկ ուսանողներից շատերн ապրում են մայրաքաղաքի հանրակացարաններում, արդյո՞ք հնարավոր կլինի Աշտարակում ապահովել նրանց կացարաններով, իսկ ինչպե՞ս են Երևանում աշխատող ուսանողները համատեղելու գործը ուսման հետ»,- ասում է նա:

Ատոմ Մխիթարյանը շեշտում է` Երևանի կենտրոնում տեղակայված մեր բուհերից շատերн ունեն շենքային լավ պայմաններ և նկատում.

«Այդ բուհերը շատ գայթակղիչ տեղերում են, ունեն լավ մասնաշենքեր, որոնք կարող են ծառայել այլ նպատակներով: Բուհերի խոշորացմամբ, տեղափոխմամբ կազատվեն այդ տարածքները»:

Կրթության մինչև 2030 թվականը զարգացման պետական ծրագրով նախատեսվում է, որ 2030-ին հայաստանյան 4 բուհ ընդգրկված կլինի միջազգային վարկանիշային աղյուսակների լավագույն 500-ի ցանկում.

«Այդ ցուցակներում ընդգրկված լավագույն համալսարանների տարեկան ֆինանսավորումը հավասար է մեր երկրի ամբողջ տարեկան բյուջեին: Այնպես որ, նման արդյունքի հասնելու համար բարձր ֆինանսավորում է պետք, իսկ այդ պոտենցիալը ես, ցավոք, դեռ չեմ տեսնում»,- նշում է փորձագետը:

Մանրամասները` տեսանյութում:

Աննա Բաբաջանյան