Բուհերի ապաքաղաքականացումը Հայաստանում մնում է բաղձալի երազանք. Նարինե Դիլբարյան․ ՏԵՍԱՆՅՈՒԹ

«Բուհերի ապաքաղաքականացումը Հայաստանում մնում է բաղձալի երազանք: Մեր բուհերի ինքնավարության մակարդակը միջինից ցածր մակարդակում է: Մեզ մոտ քաղաքականացվել՝ նշանակում է շրջապատել քեզ վստահելի մարդկանցով` անկախ կառավարչական որակներից: Շատ վտանգավոր է, երբ վստահելիությունը դառնում է առաջնային գործոն, կրթությունն ու գիտությունն այդ գործընթացից պետք է հեռու պահել»,- Factor TV-ի հետ զրույցում նման տեսակետ է հայտնում ԵՊՀ դոցենտ, լեզվաբան Նարինե Դիլբարյանը:

Ամփոփելով արդեն անցած ուսումնական տարին` նա անդրադառնում է միասնական քննություններին և նկատում, որ թեստերը հաճախ մոլորեցնող են, և դա, կարծես, դիտավորյալ է արվում։

«Ընդունելության քննությունը չպետք է լինի ծուղակ, այլ բաց դարպաս: Եկեք բուհեր հեշտ ընդունենք դիմորդներին, իսկ ընթացքում վատ առաջադիմությամբ ուսանողներին մաղենք. դա է ճկուն մոտեցումը»,- ասում է նա։

Նարինե Դիլբարյանը խոսում է նաև բուհերի գործունեության և աշխատաշուկայի կապի մասին՝ շեշտելով, որ այն բավական թույլ է. «ԿԳՄՍ նախարարությունում պետք է հաշվարկեն՝ առաջիկայում Հայաստանն ինչ մասնագետների կարիք է ունենալու և, ըստ առաջնահերթությունների, համապատասխան ծրագրեր մշակեն: Իսկ կրթական ծրագրերի խոշորացումը, որի մասին խոսվում է, օրինակ, ԵՊՀ-ում, դրական արդյունք չի տալու. մենք ունենալու ենք, այսպես ասած, «ընդհանրական մասնագետներ», մինչդեռ 21-րդ դարը նեղ մասնագիտություններինն է»:

Մեր զրուցակիցը նշում է, որ պետությունը պետք է իր համար առանձնացնի գերակա ուղղություններ և գտնի համապատասխան մասնագետներին խրախուսելու միջոցներ. «Մենք ազգային անվտանգության մասնագետների, հետախույզների, ռազմական տեսաբանների, ինժեներների, ճանապարհաշինարարների խիստ կարիք ունենք: Այս մասնագիտությունները պետք է դարձնենք գրավիչ, սահմանենք բարձր կրթաթոշակներ, զեղչային ճկուն համակարգ: Մեծ սխալ թույլ կտանք՝ կրթական ծրագրերի խոշորացման կեղծ ուղով գնալով»:

Մանրամասները` տեսանյութում:

Աննա Բաբաջանյան