15.09.2026 | 16:53
Ըստ ՔԿ-ի՝ տղամարդը կնոջը դուրս է գցել ընթացող մեքենայից՝ 4-ամյա դստեր ներկայությամբ
ՀԴՄ եմ գնել 450.000 դրամով, հիմա էլ նո՞րը պետք է գնեմ․ դժգոհություններ նոր սարք ձեռք բերելու պահանջից․ ՏԵՍԱՆՅՈՒԹ
Քաղաքականություն
16.06.2022 | 21:22
Ընդամենը երկու շաբաթից ուժի մեջ մտնող անկանխիկ գնումների հնարավորության պարտադիր պահանջի մասին Factor TV-ի այցելած մոտ 1 տասնյակ խանութներից և ոչ մեկում հստակ պատկերացում չունեին։ Շատ սեփականատերեր չգիտեն՝ ինչ պետք է անել և ինչպես։
Կոշիկի վաճառքով զբաղվող Վրեժ Մինասյանն ասում է, որ 2-3 տարի առաջ էլ իրենց պարտադրվեց նոր սերնդի ՀԴՄ սարք գնել 160․000 դրամով, իսկ 55․000 դրամով գնած սարքերը մինչև հիմա տանը դրված են՝ չեն օգտագործվում։ Հիմա էլ նոր պարտադրանքը տարակուսանք է առաջացնում։
Գևորգ Ավետիսյանն էլ հեռախոսների և դրանց աքսեսուարների առք ու վաճառքով է զբաղվում։ Ասում է՝ հազվադեպ է պատահում, որ հաճախորդներն անկանխիկ վճարելու ցանկություն հայտնեն։
Հայաստանում այսօր բոլոր առևտրի կետերը չեն, որ անկանխիկ գործարք անելու հնարավորություն ունեն։ Այսօր շուրջ 62 հազար նոր սերնդի ՀԴՄ է գործում, որոնցից փոս-տերմինալով վճարում անելու հնարավորություն ունի միայն 12․500-ը, սակայն մյուսներն էլ կարող են ակտիվացնել այդ հնարավորությունը՝ դիմելով բանկ։ Ծառայության ակտիվացումն անվճար է՝ մեզ տեղեկացրեցին բանկերից մեկից, սակայն եթե ամսական շրջանառությունը չի գերազանցում 100․000 դրամը, ծառայությունն ապաակտիվանում է և կրկին ակտիվացնելը կարժենա 50․000 դրամ։
Հանրապետությունում դեռևս 514 ՀԴՄ էլ հին սերնդի է, որ գործում է օրենքի խախտմամբ, նրանց նկատմամբ արդեն տույժեր կկիրառվեն, եթե նոր սերնդի ՀԴՄ-ներ ձեռք չբերեն։
Ինչո՞ւ է պարտադրվում նոր ՀԴՄ ազատ մրցակցային շուկայում տնտեսավարողներին, ինչպե՞ս է պետությունը որոշել, որ հարկման արդյունավետությունը կախված է ՀԴՄ-ի տեսակից: Ինչո՞ւ պետությունը չի տրամադրում այդ հաշվիչ-դրամարկղային մեքենաները տնտեսավարողներին, այլ պարտադրում է գնել, ի՞նչ են անելու մարդիկ իրենց հին սերնդի, բայց նորմալ աշխատող ՀԴՄ-ները․ այս և նմանօրինակ մի շարք հարցեր են բարձրացնում տնտեսվարողները, բայց պատասխաններ առայժմ չկան։
Կենտրոնական բանկի նախագահի տեղակալ Հովհաննես Խաչատրյանն էլ տեղեկացնում է, որ այս պահին երկու առևտրային բանկ պատրաստակամություն է հայտնել փոս-տերմինալի ծառայությունն ակտիվացնել ավելի մատչելի արժեքով։
Ամբողջությամբ ներդրվելու դեպքում այս ծրագիրը կնպաստի կանխիկ շրջանառության և ստվերի կրճատմանը, նաև հարկերի ծավալի ավելացմանը՝ ասում են պատկան մարմինները։
Հուլիսի 1-ից որոշ ոլորտներում ու դեպքերում անկանխիկ վճարումների պահանջը կլինի պարտադիր։ 15 օրից 300 հազար դրամը գերազանցող բոլոր գործարքները պետք է իրականացնեն միայն անկանխիկ։ Ավտոմեքենայի կամ տան կանխիկով վաճառքի դեպքում գործարքն առոչինչ կճանաչվի։ Ամբողջությամբ անկանխիկ կդառնան նաև բուժհաստատություններում վճարումները։
Մանրամասները՝ տեսանյութում։
Սաթենիկ Հայրապետյան
