Քաղաքականություն
15.01.2025 | 18:22
Հայաստանի կողմից ՌԴ դեսպան Սերգեյ Կոպիրկինին բողոքի նոտայի ֆոնին Մոսկվայում հիշել են Խորհրդային միության տարիների հայ հերոսներին։ Այսպես, ՌԴ ԱԳՆ պաշտոնական կայքում հրապարակվել է ԽՍՀՄ տարիներին պատերազմին մասնակցության ժամանակ սխրանքների համար հերոսի կոչում ստացած Կարապետ Սիմոնյանի լուսանկարն ու նրա մասին տեղեկատվություն։
ՌԴ արտաքին քաղաքական գերատեսչության սոցցանցում արված գրառման մեջ ասվում է, որ «1940 թվականի հունվարի 15-ին ԽՍՀՄ Գերագույն խորհրդի նախագահության հրամանագրով որոշում է կայացվել կարմիր բանակի զինծառայող Կարապետ Սիմոնյանին Խորհրդային Միության հերոսի կոչում շնորհելու մասին։
«Ռադիոօպերատոր Սիմոնյանն իր աննախադեպ սխրանքը գործել է 1939 թվականի դեկտեմբերի 13-ին՝ ԽՍՀՄ-Ֆինլանդիա պատերազմի ժամանակ՝ 21 տարեկանում, Մուլանջարվի լճից արևմուտք գտնվող Կարելական Իստմուսում թշնամու պաշտպանությունը հետախուզելիս»,- ասված է գրառման մեջ, որում նշվում է, որ հայազգի հերոսի շնորհիվ ոչնչացվել է թշնամու Տ-28 տանկը։
Հրամանատարի և մյուս տանկիստների հետ նրան հաջողվել է հետ մղել թշնամու բազմաթիվ հարձակումները, իսկ հետո մարտադաշտից տանել վիրավոր ընկերներին։
Ուշագրավ է, որ ՌԴ ԱԳՆ-ն իր էջում նման հրապարակում է արել այն բանից հետո, երբ Հայաստանում Ռուսաստանի դեսպան Սերգեյ Կոպիրկինը կանչվել է ՀՀ ԱԳ նախարարություն, նրան բողոքի հայտագիր է հանձնվել։ ՀՀ ԱԳՆ-ի հաղորդագրության համաձայն՝ պատճառը հունվարի 12-ին Ռուսաստանի Դաշնության համառուսաստանյան պետական հեռուստատեսության եթերում թողարկված «Շաբաթվա լուրեր» հաղորդման ընթացքում Հայաստանի ինքնիշխանության և տարածքային ամբողջականության դեմ արհեստականորեն գեներացված խոսույթներ հնչեցնելն է։
ՀՀ-ն ՌԴ-ին բողոքի հայտագիր է հղել․ դեսպան Կոպիրկինին կանչել են ԱԳՆ
Բանն այն է, որ այդ եթերի ընթացքում հաղորդավար Դմիտրի Կիսելյովը մեկնաբանել է, այսպես կոչված, «Զանգեզուրի միջանցքի» շուրջ Բաքվի ու Երևանի միջև վեճը, ինչպես նաև Հայաստանի ձգտումները դեպի Եվրոպական միություն։
«Ադրբեջանի համար կենսական նշանակության է մնում ավտոճանապարհի բացումը «Զանգեզուրի միջանցքով», ինչի մասին պայմանավորվել են դեռևս 2020 թվականի նոյեմբերի 10-ին՝ հայ-ադրբեջանական պատերազմի արդյունքներով Պուտինը, Ալիևն ու Փաշինյանը եռակողմ հայտարարությունում։ Ընդամենը 40 կմ երկարությամբ «Զանգեզուրի միջանցքը» պետք է միացնի Ադրբեջանի հիմնական տարածքն իր էքսկլավ Նախիջևանի, իսկ այնտեղից՝ Թուրքիայի հետ։ Ելույթ ունենալով լրագողների առջև՝ նախագահ Ալիևը բացառիկ վճռական է եղել։ Գնահատեք ինքներդ»,- եթերում ասում է Կիսելյովը՝ միացնելով Ալիևի՝ ՀՀ-ի հասցեին սպառնալիքներով ելույթը։
Կիսելյովն արձագանքել է իր հաղորդման պատճառով ՌԴ դեսպանին ՀՀ ԱԳՆ կանչելուն
Ի թիվս այլ բաների, եթերում նշվել է այն տնտեսական օգուտները, որոնք Հայաստանը ստանում է որպես Եվրասիական տնտեսական միության անդամ։ Մեջբերվել է ՌԴ փոխվարչապետ Ալեքսեյ Օվերչուկի հայտարարությունը, որն անհամատեղելի է անվանել ԵՏՄ-ին և Եվրամիությանը միաժամանակյա անդամակցությունը։
Թարգմանությունը՝ Տաթև Ֆռանգյանի
Կիսելյովի հաղորդման հեռարձակումը կարող է արգելվել ՀՀ-ում․ Մխիթար Հայրապետյան․ ՏԵՍԱՆՅՈՒԹ
