Կիսելյովի հաղորդման հեռարձակումը կարող է արգելվել ՀՀ-ում․ Մխիթար Հայրապետյան․ ՏԵՍԱՆՅՈՒԹ

«Օրերս «Ռոսիա 1» հեռուստաալիքով հաղորդավար Դմիտրի Կիսելյովի կողմից որոշակի հայտարարություններ են հնչեցվել, մասնավորապես արհեստական գեներացված անընդունելի թեզեր, խոսույթներ են շրջանառության մեջ դրվել, որոնք ՀՀ ինքնիշխանության և տարածքային ամբողջականության դեմ են»,- այս մասին ԱԺ-ում լրագրողների հետ ճեպազրույցում նշել է ԲՏԱ նախարար Մխիթար Հայրապետյանը՝ անդրադառնալով Հայաստանում ՌԴ դեսպանին ԱԳՆ կանչելուն և բողոքի հայտագիր ներկայացնելուն։

Նրա խոսքով՝ ինչպես Սոլովյովի հաղորդման պարագայում եղավ, Կիսելյովի հաղորդման հեռարձակումը ևս կարող է մեր երկրում արգելափակվել։

«Բոլոր այն հաղորդումները, որոնք կհեռարձակվեն մեր երկրի տարածքում, հասանելի կլինեն հայաստանյան հեռուստադիտողի համար, իրենց հեռուստակոնտենտով ու բովանդակությամբ պետք է համապատասխանեն օրենսդրությամբ սահմանված կարգով բովանդակությանը, ճիշտ այնպես, ինչպես հայաստանյան տեղական մյուս հեռուստաալիքներն են այդ կանոններին հետևում: Ես կարծում եմ՝ այստեղ ՀՀ կառավարության ակնկալիքը լեգիտիմ է, օբյեկտիվ է և արդար է»,- նկատեց նախարարը։

Մխիթար Հայրապետյանը հայտնեց, որ այս հարցով բողոք են ներկայացրել ՀՀ Հեռուստատեսության և ռադիոյի հանձնաժողով, պատասխան ստանալուց հետո նախարարությունը և կառավարությունը կհստակեցնեն իրենց անելիքները։

Նախարարը հայտարարեց, որ բոլոր միջազգային հեռուստաալիքներով հեռարձակվող կոնտենտը, որը ուղիղ կհակասի ՀՀ-ի պետական շահերին, լրջորեն վերանայվելու է, իսկ հարկ եղած դեպքում՝ դրանց հեռարձակումը արգելափակվելու։

Հիշեցնենք, որ նախորդ տարի գարնանը «Հայաստանի հեռուստատեսային և ռադիոհաղորդիչ ցանց»-ը արգելափակել էր հանրային մուլտիպլեքսով սփռվող «Երեկոն Վլադիմիր Սոլովյովի հետ» և «Կիրակի երեկոն Վլադիմիր Սոլովյովի հետ» հեղինակային հաղորդումների հեռարձակումը Հայաստանի տարածքում:

2024 թվականի փետրվարին Երևանը բողոքի նոտա էր հղել Մոսկվային՝ զանգվածային հաղորդակցության երկկողմ համաձայնագիրը խախտելու համար՝ նշելով, որ «Հայաստանի Հանրապետությունը չի կարող տոլերանտ լինել այնպիսի բովանդակություն ունեցող հաղորդումներին, որոնք կարող են հարցականի տակ դնել մեր պետության և ժողովրդի արժանապատվությունը»։

Տարեվերջյան ամփոփիչ ասուլիսի ժամանակ Մխիթար Հայրապետյանը Factor TV-ի հարցին ի պատասխան ասել էր, որ  անցած տարի հայկական կողմը ռուս գործընկերներին երկու անգամ առաջարկ է ուղարկել միջպետական համաձայնագրում փոփոխություններ կատարելու վերաբերյալ, սակայն պատասխան չի ստացել։ Նա հայտնել էր, որ այս ամիս նախարարությունը պատրաստվում է ռուսական հեռաուստալիքների վերաբերյալ նոր առաջարկներ ուղարկել Մոսկվա։  Հայրապետյանը միևնույն ժամանակ մատնանշել էր, որ տևական ժամանակ ռուսական հեռուսալիքների բովանդակությունում խախտումներ չեն արձանագրվել։

Հայ- ռուսական զանգվածային հաղորդակցության երկկողմ համաձայնագրի ժամկետը լրանում է 2027 թվականին: Հիշեցնենք` ՀՀ վարչապետ Նիկոլ Փաշինյանը անցած տարի հայտարարել էր, որ Երևանը կարգելափակի ռուսական ալիքների հեռարձակումը Հայաստանում, եթե նրանք չհարգեն պետական կարգն ու հանրապետության շահերը:

Մանյա Պողոսյան