Բացի մեր թեմի հոգևորականներից, եթե որևէ մեկը Սուրբ Յոթ Վերք եկեղեցում պատարագ մատուցի, կնշանակի՝ առաջնորդանիստը բռնազավթված է․ Շիրակի թեմի հայտարարությունը

Շիրակի թեմը հայտարարություն է տարածել, որով տեղեկացնում է, որ պատարագ մատուցելիս հիշատակելու են  Հայրապետի և թեմակալ առաջնորդ  Տ. Միքայել Արք. Աջապահյանի անունները։

«Շիրակի թեմի հոգևորականաց հայտարարությունը

Մենք՝ ներքոստորագրյալներս՝ Շիրակի թեմի հոգևորականաց դասը, հայտարարում ենք, որ հիմա և միշտ, մեր կոչումին վայել, անշեղորեն կանոնական Սուրբ Պատարագ ենք մատուցելու և, մեր հավատարմությամբ առ Միածնաէջ Սուրբ Էջմիածին և նրա օրինավոր գահակալ՝ Ն.Ս.Օ.Տ.Տ. Գարեգին Բ Սրբազնագույն Կաթողիկոս, հիշատակելու ենք մեր Հայրապետի և թեմակալ առաջնորդ Բարձրաշնորհ Տ. Միքայել Արք. Աջապահյանի անունները:

Ի գիտություն մեր հավատավոր ժողովրդի հայտնում ենք, որ եթե, բացի մեր թեմի հոգևորականներից, որևէ մեկը Շիրակի թեմի եկեղեցիներից մեկում և, մասնավորապես Սուրբ Յոթ Վերք եկեղեցում Պատարագ մատուցի, կնշանակի՝ առաջնորդանիստը բռնազավթված է, որով խոչընդոտվում է Հայ Առաքելական Սուրբ Եկեղեցու Շիրակի թեմի օրինական գործունեությունը և կրոնական ծեսի՝ Սուրբ Պատարագի, իրավասու հոգևորականի կողմից մատուցումը՝ խաթարելով հավատացյալների հոգևոր պահանջների իրացումը:
Յոթ Վերքը հաղթահարել է թուրքական երկու օկուպացիա, սա՛ էլ կհաղթահարվի պատվով»,- ասված է հաղորդագրությունում ու կից ներկայացված է ստորագրացուցակը։

Հիշեցնենք, որ նախօրեին Factor TV-ն տեղեկացրել էր, որ Շիրակի թեմի քսանից ավելի հոգևորականներ հրաժարվել են վարչապետի սցենարով պատարագ մատուցել, այն է՝ որ պատարագիչն արարողության ընթացքում չհիշատակի Ամենայն հայոց Գարեգին երկրորդ կաթողիկոսի անունը։