14.12.2025 | 17:25
Իրավիճակը ճանապարհներին՝ 17։15-ի դրությամբ
ՏԱՐԱԿԱՐԾԻՔ. Ինչո՞ւ Հայաստանը չի ընդունում ընտանեկան բռնության մասին օրենք
Հաղորդաշարեր
26.06.2017 | 18:00
Մեկ ամիս առաջ՝ մայիսի 25-ին Վանաձորում տեղի ունեցածը, երբ պարբերաբար բռնության ենթարկված 32-ամյա Լիաննա Կիրակոսյանը սպանեց ամուսնուն՝ մեծ աղմուկ բարձրացրեց: Տարածված տեղեկատվության համաձայն՝ Լիանան դիմել էր ինքնապաշտպանության՝ ամուսնու կողմից բռնության հերթական դրսևորման ընթացքում: Այդ միջադեպը կրկին վեր հանեց Հայաստանում ընտանեկան բռնության մասին օրենք ունենալու հրամայականը:
Չնայած՝ տարեցտարի ավելանում են ընտանեկան բռնության դեպքերը, այնուամենայնիվ Հայաստանը դեռևս չի ընդունել ընտանեկան բռնության մասին օրենքը: Միայն 2016 թվականին Հայաստանում բռնության հետևանքով կանանց մահվան 14 դեպք է գրանցվել: Տարիներ շարունակ տարբեր հասարակական կազմակերպություններ բարձրաձայնել են ընտանեկան բռնությունը կանխարգելող օրենքի անհրաժեշտության մասին, ավելին՝ օրինագծեր են մշակել, ներկայացրել Կառավարություն, սակայն դրանք մերժվել են և մնացել թղթի վրա՝ ի հակառակ մեր երկրի ստանձնած պարտավորությունների:
«Ընտանեկան բռնության մասին» օրինագծի ընդունմանն ուղղված քայլեր առաջինն արել է «Կանանց իրավունքների կենտրոնը» 2009 թվականին, ապա 2013 թվականին «Ընդդեմ կանանց նկատմամբ բռնության կոալիցիան» է հարցը դարձյալ օրակարգ բերել, բայց այս անգամ էլ չի հաջողվել հասնել օրենքի ընդունմանը: 2016 թվականին արդեն Արդարադատության նախարարությունը ձեռնամուխ եղավ օրինագծի մշակմանը, որը, սակայն, հանրության մի մասի կողմից ընդունվեց սուր քննադատություններով:
Օրենքի ընդունմանը դեմ արտահայտվողները պնդում էին, թե այն միտված է երեխաներին խլելու իրենց ընտանիքներից՝ խարխլելով հայ ավանդական ընտանիքի հիմքերը: Օրենքի ընդունման կողմնակիցները, մինչդեռ հակադարձում էին՝ նման դրույթ նախագծում չկա և չի կարող լինել:
Հնչած քննադատություններից հետո Արդարադատության նախարարության պաշտոնական կայքից նախագիծը հանվեց, այժմ այն աշխատանքային քննարկման փուլում է և առաջիկայում կրկին կներկայացվի հանրությանը: Ի դեպ, համեմատության համար նշենք, որ հարևան երկրները՝ Վրաստանը, Ադրբեջանն ու Թուրքիան վաղուց են ընդունել «Ընտանեկան բռնության մասին» օրենքներ:
Ի վերջո՝ ինչո՞ւ մինչ օրս Հայաստանը չունի ընտանեկան բռնությունը կանխարգելող օրենք: Թեմայի շուրջ Factor.am-ը զրուցել է Ազգային ժողովի ՀՅԴ խմբակցության պատգամավոր Արմենուհի Կյուրեղյանի և «Ընդդեմ կանանց նկատմամբ բռնության» կոալիցիայի համակարգող, իրավապաշտպան Զառա Հովհաննիսյանի հետ:
Շողիկ Գալստյան
