06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
«Հիվանդ» առողջապահությունը․ ՀՀ բնակչության 12%-ից ավելին չի կարողանում դիմել բուժօգնության․ ՏԵՍԱՆՅՈՒԹ
Հասարակություն
16.04.2022 | 14:00
Numbeo վիճակագրական տվյալների վերլուծության հարթակն առողջապահական համակարգի վերաբերյալ տվյալներ է հրապարակել, որոնց համաձայն՝ Հայաստանը ներառված չէ ինդեքսի առաջատար 95 երկրների շարքում։
Հայաստանի առողջապահական համակարգը կատարյալ չես համարի, խնդիրները շատ են ու տարաբնույթ։ Հասկանալու համար, թե առողջապահական համակարգն ինչ վիճակում է, ըստ վիրաբույժ-ուռուցքաբան Վահե Տեր-Մինասյանի, պետք է մի քանի հանգամանք հաշվի առնել՝ պոլիկլինիկաներից մինչև բուժանձնակազմ։
Լավ վարկանիշ ունենալու համար, ըստ Վահե Տեր-Մինասյանի, չունենք լավ ուսումնական գործընթաց, բժշկական ռեսուրս և տեխնիկական հագեցվածություն։ Չկա նաև բավարար ֆինանսավորում՝ թե՛ պետական, թե՛ մասնավոր։
Առողջապահական համակարգի խնդիրներից խոսելիս հանրային առողջության մասնագետ Դավիթ Մելիք-Նուբարյանն էլ առանձնացնում է բժշկական ծառայությունների հասանելիության հարցը։
Հայաստանում նաև անհամաչափ է բաշխված բժշկական անձնակազմը՝ ասում է Դավիթ Մելիք-Նուբարյանը։ 80 տոկոսը կենտրոնացած է Երևանում և միայն 20 տոկոսը՝ մարզերում։ Առողջապահական ու ժողովրդագրական ցուցանիշներն էլ տարբեր են։ Օրինակ՝ եթե դրական դինամիկա ունենք մայրական ու մանկական մահացության ցուցանիշների պարագայում, ապա 2020 թվականից Հայաստանում շարունակում է բարձր մնալ մահացության ցուցանիշը, ընդ որում՝ այս ցուցանիշի պատճառների վրա միայն քովիդի համավարակն ու պատերազմը չէ, որ ազդել են։ Ավելացել են նաև սիրտ-անոթային, շնչառական օրգանների, նաև ուռուցքաբանական հիվանդություններից մահացությունները։
Հայաստանում առողջապահությանն ուղղվող բյուջեն կազմում է ՀՆԱ-ի ընդամենը 1,5 տոկոսը, որը, ըստ նախարարի, բավականին ցածր է։ Անահիտ Ավանեսյանը վստահ է, որ առողջապահական համակարգի զարգացմանը կնպաստի նաև առաջիկայում ներդրվելիք առողջապահական պարտադիր ապահովագրությունը։
Մանրամասները՝ տեսանյութում։
Սաթենիկ Հայրապետյան
