04.12.2025 | 23:29
Թուրքիայում լրագրողին մեղադրանք է առաջադրվել Հայոց ցեղասպանության հետ կապված հոդվածով
Հայաստանում նկատելի է սեզոնային վիրուսների ակտիվացում. նախարար
02.12.2025 | 22:19
Հայաստանում նկատելի է սեզոնային վիրուսների ակտիվացում: Առողջապահության նախարար Անահիտ Ավանեսյանը զգուշացրել է, որ գրիպի, ռինո-, բոկա-, ադենովիրուսների և պարագրիպի հարուցիչների ակտիվության շրջանում կանխարգելիչ միջոցառումների թվում առաջնային տեղում է պատվաստումը, իսկ սուր շնչառական վարակների տարածման դեպքում դպրոցներում և նախադպրոցական հաստատություններում ուսուցումը կարող է անցնել հեռավար ձևաչափի: Այս մասին ֆեյսբուքյան իր էջում գրել է առողջապահության նախարար Անահիտ Ավանեսյանը։
«Շրջանառվում են գրիպ A(H3N2) տիպի վիրուսները. ախտանշաններն են` բարձր ջերմություն (39 – 40C), հազ, քթահոսություն, մկանահոդացավ:
Շրջանառվում են նաև ռինո-, բոկա-, ադենովիրուսներ և պարագրիպի հարուցիչները։
Սուր շնչառական վարակների սեզոնին ԿԳՄՍ-ի հետ համատեղ նախադպրոցական ու դպրոցական հաստատություններում ներդրվել է «համաճարակային ֆիլտր», որի սահմանաչափը գերազանցելու դեպքում ուսուցումը անցնում է հեռավար ձևաչափի։
Գրիպի լավագույն կանխարգելումը պատվաստումն է, որը
-նվազեցնում է հիվանդանալու հավանականությունը,
-թեթևացնում է հիվանդության ընթացքն ու բարդությունները։
Պատվաստվեք այսօր՝ պաշտպանելով ձեզ և շրջապատին»,- գրել է նախարարը։
Նախօրեին Հիվանդությունների վերահսկման և կանխարգելման ազգային կենտրոնից տեղեկացրել էին, որ նախադպրոցական ու դպրոցական հաստատություններում գրանցվել է 55 030 բացակա, որոնցից 11 033-ը՝ սուր շնչառական վարակների պատճառով։
