14.09.2026 | 15:03
Իրանը կանչել է Ավստրիայի դեսպանին՝ Վիեննայում կայանալիք միջուկային համաժողովին իր պաշտոնյայի մասնակցությունը խոչընդոտելու համար
10 ձվով ձվածեղ՝ կրկնակի էժան. հավկիթի գնի նվազումը թանկ կնստի մանր արտադրողների վրա. ՏԵՍԱՆՅՈՒԹ
Տնտեսություն
22.02.2022 | 21:20
Ձվի գինը իջել, հասել է 30-40 դրամի։ Այսօր դեռ կարող եք վայելել, օրեր-շաբաթներ անց գինը կարող է վերադառնալ նախկին մակարդակին։ Այսօրվա էժանությունը հնարավոր է թանկ նստի սպառողների վրա։ Մինչ այդ, մարդիկ գոհ են՝ ավելի շատ են գնում։
Թռչնաբույծների միության նախագահ Սերգեյ Ստեփանյանը Factor TV-ի հետ զրույցում գների նվազումը բացատրում է նրանով, որ թռչնաբուծարանների աշխատանքը որոշակի սեզոնայնություն ունի։ Ամռան ամիսներին և հունվար-փետրվարին սովորաբար ձվի սպառումը նվազում է, հետևաբար՝ գինն էլ է իջնում։ Սակայն դրան հիմա գումարվել է մեկ այլ կարևոր գործոն։
«Հիմնական պատճառներից մեկը, որ նոր խաղացողներ են շուկա մտել, ածանների գլխաքանակը մեծացել է, արդյունքում ստացել ենք նախատեսվածից ավելի արտադրանք։ Իմ կարծիքով՝ հակամրցակցային ոչ մի բան չկա»,- նշում է Ստեփանյանը։
Ինչ վերաբերում է թռչնաբուծական տնտեսությանը, միության նախագահը խնդիրներ է կանխատեսում, և այդ խնդիրներին բախվելու են հատկապես փոքր արտադրողները։ Մասնագետը բացատրում է, որ փոքր արտադրությունների դեպքում ձվի ինքնարժեքը բարձր է լինում։ Հետևաբար՝ նման ցածր գնի պայմաններում հենց նրանք են դուրս մղվելու շուկայից։
«Խնդիրն այն է լինելու, որ շուկան նորից բալանսի կգա, պահանջարկն ու առաջարկը կհավասարվեն։ Իսկ մանր արտադրողները, որոնց մոտ ինքնարժեքն ավելի բարձր է, քան խոշորներինը, հավանաբար, շուկայից դուրս կմնան»,- բացատրում է միության նախագահը։
Նույնպիսի իրավիճակ եղել է 2019-2020-2021 թվականներին, հավկիթի շուկայում եղել են խիստ էժանացումներ ու խիստ թանկացումներ։ Հուլիսին մրցակցության պաշտպանության հանձնաժողովի հրապարակած ուսումնասիրությունից պարզ է դառնում, որ 2019-ից Հայաստանում եղել է ձվի գերարտադրություն, որը շարունակվել է 2020 թվականի առաջին ամիսներին։ Ձուն վաճառվել է 30-32 դրամով։
«Ստեղծված իրավիճակի պատճառով ձու արտադրող ընկերությունները մինչև 2020 թվականի օգոստոսն աշխատել են վնասով, որի հետևանքով մի շարք տնտեսվարող սուբյեկտներ դուրս են մղվել շուկայից, իսկ մյուսները նվազեցրել են արտադրության ծավալները»,- նշվում էր ՄՊՀ փաստաթղթում։
ՄՊՀ որոշումներով՝ Արզնու թռչնաֆաբրիկան տուգանվեց շուրջ 16 մլն 650 հազար դրամով, Արզնու տոհմային ԹՏԽ-ն՝ շուրջ 10 մլն 910 հազար դրամով, Աշտարակ ձուն տուգանվեց շուրջ 15 մլն 40 հազար դրամով։
Կողմնակի ազդակներն արդեն ցույց են տալիս, որ տնտեսվարողները մասնակի հրաժարվում են ձվի արտադրությունից ու վաճառում են հավերը։ ՍԱՏՄ-ից երեկ ահազանգում էին, որ մարդիկ մեքենաների թափքերի միջից թռչնամիս են վաճառում։
Մանրամասները՝ տեսանյութում։
Գարիկ Հարությունյան
