Հաղորդաշարեր
12.03.2018 | 18:45Խիստ վերահսկվող ու խնայվող ծախսային բյուջեով ու 6.8 մլրդ դոլար արտաքին պարտքով է ՀՀ կառավարությունը խոստանում զարգացման նոր ծրագրեր իրականացնել: Թվում է՝ գոտիները ձգելու մասին հայտարարությունները պետք է դառնային իշխանությունների հետագա գործունեության հիմքը, սակայն իրողությունն այլ է:
Վերջին տասը տարիներին Հայաստանի պետական պարտքը քառապատկվել է, աղոտ հեռանկարով և անհասկանալի վերջնարդյուքներով նախագծերը՝ ևս: Գոտիները ձգելուն զուգահեռ կառավարությունը կրկնապատկում է գերատեսչությունների մեքենաների ու դրանց պահպանման ծախսերը՝ դարձնելով 68 մլն դոլար, նաև բազմամիլիոն դոլարանոց նոր ծրագրեր են նախագծվում կամ արդեն ֆինանսավորվում բյուջեից, որոնց հեռանկարներն ու արդյունավետությունը խիստ կասկածելի է: Օրինակ՝ Երևանում զբոսաշրջային հոսքերն ավելացնելու և ոլորտին զարկ տալու նպատակով Կառավարությանն առընթեր քաղաքաշինության պետական կոմիտեն նախաձեռնել է «Հայկական գյուղ» ազգագրական թաղամասի կառուցում: Ծրագրով, որը գնահատվում է 100-150 մլն դոլար, նախատեսվում է ստեղծել Հայաստանի տարբեր տարածաշրջանների քաղաքային և գյուղական բնակավայրերի ազգային ավանդույթներին ու ճարտարապետական դիմագծին բնորոշ ազգագրական թաղամաս՝ բնակելի տներով, հյուրանոցներով, ինչպես նաև` ազգային արհեստները ներկայացնող ցուցասրահներով:
Կառավարությունում վստահ են, որ «Հայկական գյուղը» կարող է դառնալ Երևանի զբոսաշրջային գրավչություններից մեկը»:
Թե ո՞րն է լինելու Երևանում կառուցված «նմուշային» գյուղերի բիզնես գրավչությունը, դժվար է ասել, բայց կառուցապատման միջազգային մրցույթն արդեն հայտարարվել է: Կրճատման հորդորներին զուգահեռ անտրամաբանական ծախսեր անելը, թերևս ժառանգաբար փոխանցվող գործելաոճ է, որը Տիգրան Սարգսյանի օրոք ամենախոսուն դրսևորումն ունեցավ, երբ ֆինանսատնտեսական ճգնաժամի երկնիշ անկումից դեռ ուշքի չեկած երկրում գնեցին 340 հազար դոլարանոց բիոզուգարաններ:
ՀՀ կառավարությունների անհեռանկարային ծախսերի ու ծրագրերի մի շարք օրինակներ առանձնացրել ենք տեսանյութում:
Սոնա Մարտիրոսյան
Գայանե Աբրահամյան
