«Տեխնիկայի դարում գիրքն ավելորդ է». համայնքային գրադարաններն օրեցօր նվազում են, օրենքը դա չի կանխում

1990 թվականից մինչև 2016 թվականը Հայաստանում փակվել է 500 գրադարան։ Հայաստանի Ազգային գրադարանի իրականացրած «Հայաստանի գրադարանները» վիճակագրական վերլուծությունից տեղեկանում ենք, որ դրանք հիմնականում համայնքային գրադարաններ են։ Միայն 2009-ին փակվել են 5 տասնյակից ավել գրադարաններ, որոնց մեծ մասը՝ գյուղերում։

Խնկո Ապոր անվան ազգային մանկական գրադարանի տնօրեն, Հայաստանի գրադարանային ասոցիացիայի նախագահ Ռուզան Տոնոյանը Factor.am-ին հետ զրույցում նկատեց՝ գրադարանների թվի մասին պաշտոնական վիճակագրության և տեղերից տրվող տվյալները ոչ միշտ են համապատասխանում։

Տարածքային կառավարման նախարարության ներկայացուցիչը մեր զրուցակցին հավաստիացրել է, որ հնարավոր է փոփոխություններ մտցվեն «Տեղական ինքնակառավարման մասին» օրենքում՝ խուսափելով համայնքային գրադարանների լուծարումից։ Նման փոփոխություններ, սակայն, դեռևս չեն արվել։ Կա մեկ այլ խնդիր՝ համայնքային գրադարանները ֆինանսական սուղ միջոցների պատճառով փակվում են, իսկ գրքերը հանձնվում են դպրոցական գրադարաններին։

Համայնքային գրադարանները փրկելու հարցում ի՞նչ կարող են անել համայնքի ղեկավարները։ Factor.am-ը զրուցեց Լեռնապատ համայնքի ղեկավար Սարիբեկ Աբազյանի հետ, ով հանդես եկավ ուշագրավ հայտարարությամբ։ Նրա խոսքով՝ Լեռնապատ համայնքի գրադարանն այրվել է 1990-ական թվականներին և դրանից հետո այլևս չի վերականգնվել։ Հարցին, թե արդյոք այդ խնդրով համայնքապետը դիմել է կառավարությանը, վերջինս պարզապես պատասխանեց, որ դրա կարիքը չկա, քանի որ հիմա տեխնիկայի դար է և այսպես թե այնպես՝ գրադարանից օգտվողները քիչ են։

Մանրամասները՝ տեսանյութում։

Աննա Բաբաջանյան