Արտակարգ դրությունը այլևս չի երկարաձգվի․ ի՞նչ միջոցառումներ կգործեն դրանից հետո․ Բադասյանի առաջարկը. ՏԵՍԱՆՅՈՒԹ

Հայաստանի Հանրապետությունում մինչև սեպտեմբերի 11-ը երկարաձգված արտակարգ դրության ռեժիմը չի երկարաձգվի, իսկ դրա ավարտից հետո կսկսեն գործել առաջարկվող միջոցառումներն ու սահմանափակումները։ Այս մասին այսօր Կառավարության նիստում հայտարարեց արդարադատության նախարար Ռուստամ Բադասյանը՝ ներկայացնելով «Հայաստանի Հանրապետության բնակչության սանիտարահամաճարակային անվտանգության ապահովման մասին» օրենքում և հարակից օրենքներում փոփոխություններ կատարելու մասին նախագիծը։

«Նախագծերում առաջարկվում է հետևյալ կառուցակարգը․ վարակիչ հիվանդությունների` Հայաստանի Հանրապետության տարածք ներբերման (ներթափանցման), դրանց ծագման ու տարածման վտանգի, բռնկումների, համաճարակների առաջացման, ինչպես նաև դրանց հետևանքով արտակարգ իրավիճակ առաջանալու դեպքերում կարող է սահմանվել կարանտին: Կարանտին հնարավոր է սահմանել առողջապահության բնագավառում պետական կառավարման լիազոր մարմնի առաջարկությամբ, մարզպետի և Երևանի քաղաքապետի կողմից, համապատասխան վարչատարածքային միավորում կամ առանձին տարածքում, այդ թվում՝ դրա տարածքում գոծունեություն իրականացնելու վայրում և Կառավարության կողմից ՀՀ ամբողջ տարածքում կամ պետական սահմանի անցման կետերում կամ համաճարակի գոտում 2 կամ ավելի մարզ ներառելու դեպքում, այդ թվում՝ ատակարգ իրավիճակի հիմք հանդիսացող կարանտինի դեպքերում»,- նշեց Բադասյանը։

Ըստ օրինագծի՝ կարող են կիրառվել հետևյալ սահմանափակող միջոցառումները․ համաճարակի (կարանտինային) գոտում մուտքի և ելքի հատուկ ռեժիմի սահմանում, «Պետական սահմանի մասին» օրենքի 16-րդ հոդվածով նախատեսված պետական սահմանով հաղորդակցության ժամանակավոր դադարեցում կամ սահմանափակում, անձանց ազատ տեղաշարժվելու իրավունքի և տրանսպորտային միջոցների տեղաշարժման սահմանափակումներ, օբսերվացիա, ինքնամեկուսացում, մեկուսացում: Արտակարգ իրավիճակի հիմք հանդիսացող համաճարակով պայմանավորված կարանտին սահմանելու դեպքում կարող են կիրառվել հետևյալ միջոցառումները․ «Հայաստանի Հանրապետության բնակչության սանիտարահամաճարակային անվտանգության ապահովման մասին» օրենքով սահմանված կարանտինային և այլ սանիտարահամաճարակային միջոցառումներ՝ սույն գլխով սահմանված առանձնահատկությունների հաշվառմամբ, հավաքներ կամ հանրային միջոցառումներ կազմակերպելու, անցկացնելու կամ դրանց մասնակցելու սահմանափակումներ, իրավաբանական անձանց գործունեության սանիտարահամաճարակային անվտանգության կանոնների սահմանում, ապրանքների փոխադրման սահմանափակումներ, կրթական հաստատությունների գործունեության սահմանափակումներ, սահմանափակումներ պետական և տեղական ինքնակառավարման մարմիններում և այլ հաստատություններում:

Մանրամասները՝ տեսանյութում։