ԱՄՆ Կոնգրեսում հայտարարել են կորոնավիրուսի լաբորատոր ծագման մասին և մեղադրել Չինաստանին

ԱՄՆ կոնգրեսականները երկամյա հետաքննությունից հետո հայտարարել են, որ COVID-19-ը, ամենայն հավանականությամբ, լաբորատոր ծագում ունի և տարածվել է վիրուսի արտահոսքի պատճառով։ Այս մասին ասվում է ամերիկացի խորհրդարանականների զեկույցում ։

«COVID-19 վիրուսը, ամենայն հավանականությամբ, առաջացել է Չինաստանի Ուհան քաղաքի լաբորատորիայից արտահոսքից»,- ասվում է Ներկայացուցիչների պալատի Վերահսկիչ հանձնաժողովի կորոնավիրուսային ենթահանձնաժողովի փաստաթղթում:

Ամերիկացի օրենսդիրները հինգ փաստարկ են ներկայացրել՝ ի պաշտպանություն կորոնավիրուսի հնարավոր արհեստական ծագման վարկածի։ Նրանք պնդում են, որ COVID-19-ն ունի բնության մեջ չգտնվող եզակի կենսաբանական բնութագրեր, և վարակի բոլոր դեպքերը ծագում են մեկ աղբյուրից, մինչդեռ նախորդ համաճարակներն ունեցել են տարածման մի քանի եղանակ։

Կոնգրեսականները նաև նշել են Ուհանում SARS վիրուսների ուսումնասիրման հետազոտական լաբորատորիայի առկայությունը։ Նրանց կարծիքով՝ այս լաբորատորիան գործել է կենսաբանական անվտանգության ոչ բավարար մակարդակով։ Զեկույցի հեղինակները մատնանշել են հիվանդության դեպքերը Ուհանի վիրուսաբանության ինստիտուտի աշխատակիցների շրջանում 2019 թվականի աշնանը՝ վայրի կենդանիների շուկայում COVID-19-ի հայտնաբերումից մի քանի ամիս առաջ։

Սեպտեմբերին ԱՄՆ-ից ու եվրոպական երկրներից գիտնականները հոդված են հրապարակել Cell ամսագրում՝ պնդելով, որ Ուհանի ծովամթերքի շուկան է դարձել կորոնավիրուսի տարածման օջախ։ Փորձագետները պարզել են, որ շուկայում վաճառվում են կաթնասուններ, որոնք կարող են վարակվել վիրուսով, այդ թվում՝ բամբուկե առնետներ և ջրարջանման շներ:

Նմուշները ցույց են տվել, որ կենդանիները վարակված են եղել, իսկ վայրի կենդանիների առևտրի ապօրինի կրպակները գտնվում են շուկայի արևմտյան հատվածում, որտեղ էլ գրանցվել են հիվանդության առաջին դեպքերը։

Թարգմանությունը՝ Տաթև Ֆռանգյանի